kompañando e orkesta di Paquito D’ Rivera na e pais Oman

Na momento ku e notisia aki a bira konosí nos ta realisá un bes mas kon grandi Kòrsou i su yunan ta. Nos yu di tera Pernell Saturnino lo forma parti di e orkesta di e konosido músiko kubano Paquito D’ Rivera ku lo bai duna un konsierto na Royal Opera House Muscat na e pais asiátiko Oman. Oman ta un pais árabe situá na e parti sùitost di Asia kaminda tin un monarkia pues e outoridat apsoluto di e pais ta den man di un sultan kende tambe lo presensiá e presentashon di e orkesta. Pernell Saturnino no ta un deskonosí den mundu musikal di perkushon ni aki na Kòrsou ni internashonalmente. Pernell ta un gran músiko ku te hasta a keda nominá pa Grammy Award den pasado. “Mi ta hopi entusiasmá ku e proyekto aki. Mi a yega di toka na diferente okashon kaba ku Paquito kende mi ta konsiderá un di e músikonan di jazz multifasétiko. Pa ami naturalmente ta un honor di forma parti di su orkesta, sigur tambe pasó e sultan di Oman lo presensiá nos presentashon”, asina Saturnino ta informá. Pernell ta sali fo’i Kòrsou djadumingu 21 di sèptèmber rumbo Amsterdam pa despues sigui pa Oman. Pernell a bisa mas aleu ku: “Apesar ku e biahe ta unu largu e espektativanan ta grandi. Lo ta un plaser pa mi bolbe topa sobra integrantenan di e orkesta, kendenan tur ta músikonan di taya ku ta bini di diferente parti di mundu”. Saturnino a konta tambe un tiki di e teatro kaminda nan lo bai presentá dia 25 di sèptèmber 2014. El a splika ku ta trata aki di un teatro relativamente nobo, grandi i luhoso. E teatro por karga un total di 1.100 persona i tin tur fasilidat di multimedia. Ya diferente músiko grandi a yega di presentá na e teatro aki manera entre otro Plácido Domingo i Andrea Bocelli. Pa Pernell mes e presentashon na Oman ta un proyekto internashonal mas ku e ta partisipá ku hopi plaser na dje. Sinembargo pa Kòrsou su partisipashon mester wòrdu mirá den un kuadro mas amplio. E ta demostrá ku nos yunan di Kòrsou por ta grandi, no solamente den ramo di por ehèmpel deporte, sino tambe den músika. Pernell su partisipashon na proyektonan internashonal di tal magnitut mester sirbi komo estímulo pa sigur nos hóbennan ku ta ambishoná pa drenta e mundu di músika òf ku ke logra halsa nan nivel musikal. Komo músiko Pernell ta hopi konsiente di e poder di músika sigur den formashon di un ser humano. “Imaginábo un dia ku ni na radio, ni televishon, ni via di internet nos no por skucha nada di músika mas, or’ei nos lo, no solamente komprondé sino, eksperenshá e poder di músika i duna esaki e balor ku e ta meresé”. Apesar ku Pernell no ta un persona ku ta buska publisidat ku su logronan el a primintí ku ora e ta bèk di su biahe lo e kompartí su eksperiensha di su estadia i presentashon na e pais asiátiko Oman. “Si mi eksperiensha por stimulá sigur e futuro generashon pa haña mas apresio pa músika i komprondé e poder di músika, sigur sigur lo mi kompartí esaki”, asina Pernell a finalisá bisando.