E kantante a hasi un tremendo trabou!

WILLEMSTAD/ Un di e metanan di e kas di produkshon Decoded ta pa duna un plataforma mas amplio na artistanan lokal. E team di Decoded ta hasi esaki ku un pensamentu ‘out of the box’ i ta sinti nan mes orguyoso di por traha ku artistanan ku por habri nan mes pa eksperensianan nobo den farándula. Un di e artistanan aki ta Harlianne ‘Yentje’ Silvanie. E no tin mester di masha introdukshon, su kanto semper ta ‘on point’ i su presentashon ekivalente na kualke artista internashonal. Tabata promé bes ku ‘Yentje’ a traha ku Decoded i mesora ta hasi esaki un kolaborashon eksitoso!

Anteriormente ya Decoded a produsí un ‘mash-up’ ku Ray Lauffer i awe ta lansa esun di ‘Yentje’. Loke ya kaba ta un tendensia masha popular riba YouTube, a haña un introdukshon na Kòrsou aña pasá- e ‘mash-up’ – di Common (originalmente di Alicia Keys) i Let Me Love You (originalmente di Justin Bieber) sigur lo ta un satisfakshon pa bo oido. Randy Rosheuvel i Christopher Walle a kolaborá ku e single dor di hasi e reprodukshon, di ámbos kansion. Solisitá e ‘mash-up di Yentje na bo radio-emisora preferí. Suskribí grátis na SoundCloud, DecodedOfficial i sigui artistanan di Decoded via di nan YouTube Channel: Decoded. Tambe por stream riba iTunes/ Spotify/ Tidal/ Apple Music. Por mira e videoclip di ‘Yentje’ riba e página di Fasebook di Decoded.