Di tres edishon Curaçao Color Walk dia 5 di yüni presentá pa EY i JCI

WILLEMSTAD —  Despues di e exito rotundo di aña pasa i bou di e slogan “Yena bo bida i di otronan ku koló”, EY Dutch Caribbean (EY) i JCI Dutch Caribbean lo organisá riba dia 5 di yüni e di dos edishon di Curaçao Color Walk. E ‘fun walk’ aki lo kuminsá i kaba na Kleine Werf  i lo kubri 5 kilometer dor di kayanan di Punda. E aspekto úniko di e festin di koló spòrtif aki ta ku partisipantenan lo ser un biaha mas kubrí ku puiru di diferente koló na diferente punto durante e ruta. En espeshal na final e evenemento lo kulminá den un fiesta di kolo ku e ‘Big Color Splash’.

E kaminata di koló aki no ta nobo pa Kòrsou. EY a lanta un komishon interno (EY Cares) ku lo sigi duna kontenido na EY su programa di responsabilidat sosial “Building a better working world”,  i lo traha pa duna un aporte positivo i duradero na desaroyo di nos komunidat. Den e kuadro ei EY tambe ta traha huntu ku Curaçao Cares. Basá riba e vishon mutuo i e dedikashon pa ehersé nan responsabilidat sosial ku EY Dutch Caribbean i JCI Dutch Caribbean ta kompartí, a disidí pa uni forsa atrobe pa huntu organisá e di tres  ‘fun walk’ di koló na Kòrsou. JCI (Junior Chamber International) Dutch Caribbean konosé 200.000 miembro aktivo rònt mundu entre 18 i 40 aña ku ta traha pa krea impakto positivo den nan mes komunidat.

No dañino pa medio ambiente

E kaminata ta kuminsa i kaba riba dia mundial di medio ambiente (5 yüni 2016) ku un warm-up i cool down di Daniel Yung i Jamila Lemans. Lokual ta hasi e kaminata aki diferente for di kaminatanan tradishonal ta ku lo tin 8 diferente stashon riba e ruta kaminda lo spùit e partisipantenan ku un puiru di koló ora nan pasa. Kada stashon di koló a ser realisá ku sosten di algun sponsor prinsipal, esta Maduro & Curiel’s Bank N.V., Subway, Fun Miles, Kooyman, ACU, Nescafé (un produkto di Martijn Trading Curaçao), Curoil i NuCapital. E impakto di koló lo resaltá riba e t-shirt ku partisipantenan lo tin bistí. E substansha no ta dañino pa salú ni pa medio ambiente i por laba kita fasil.

Meta

Henter Kòrsou ta invitá un biaha mas pa bin kana, kore, baila i gosa ku otro riba e ruta pa selebrá un estilo di bida salú i pa alabes duna un otro su bida tambe koló.  Kada persona ku partisipá tambe ta kontribui direktamente pa hasi bida di esnan ku mester di sosten den nos komunidat mas kolorido. E meta di Curaçao Color Walk ta pa rekoudá fondo pa otorgá na JCI Dutch Caribbean, EY Cares i 4 Fundashon kual nan ta Fundashon Formashon Awe Progreso Mañan i Fundashon Guia Eduká y Forma, Fundashon Konstruyendo Un Mihó Kòrsou i Ronald McDonald House Charities.

Benta di t-shirt

Personanan di tur edat por partisipá; mucha (for di 4 aña), hende yòn i hende grandi, famia i grupo di amigu i kolega tur ta bon biní. Benta di t-shirt lo tuma lugá dia 28 di mei di 10:00 am te ku 7:00 pm na Kooyman Zeelandia i di 10:00 am te ku 3:00 pm na Subway Brionplein, i si tin t-shirt disponibel tambe riba dia 29 di mei di 10:00 am te ku 2:00 pm na Kooyman Zeelandia i riba 30 di mei di 12:00 pm te ku 7:00 pm na Kooyman Zeelandia. Preis ta 20 florin pa mucha i adulto i esaki por wordu pagá ku Fun Miles tambe. Tur partisipante lo haña un t-shirt koló blanku p’asina e kolónan resaltá. Durante e kaminata lo parti awa i fruta, i lo por sigui fiesta ku ambiente musikal na enkargo di DJ Lu-C y MC Hype.

Pa mas informashon i detayenan esklusivo bishitá e Facebook di Curaçao Color Walk òf mail curacaocolorwalk@gmail.com