Di dos edishon Curaçao Color Walk dia 7 di yüni presentá pa EY i JCI

WILLEMSTAD —  Despues di e exito rotundo di aña pasa i bou di e slogan “Yena bo bida i di otronan ku koló”, EY Dutch Caribbean i JCI Dutch Caribbean lo organisá riba dia 7 di yüni e di dos edishon di Curaçao Color Walk. E ‘fun walk’ aki lo kuminsá i kaba na Parasasa beach i lo kubri 6 kilometer dor di kayanan di Piscadera, Otrobanda i Koredor. E aspekto úniko di e festin di koló spòrtif aki ta ku partisipantenan lo ser un biaha mas kubrí ku puiru di diferente koló na diferente punto durante e ruta. En espeshal na final e evenemento lo kulminá den un fiesta di kolo ku e ‘Big Color Splash’. E kaminata di koló aki no ta nobo pa Kòrsou. EY a lanta un komishon interno (EY Cares) ku lo sigi duna kontenido na EY su programa di responsabilidat sosial “Building a better working world”,  i lo traha pa duna un aporte positivo i duradero na desaroyo di nos komunidat. Den e kuadro ei EY tambe ta traha huntu ku Curaçao Cares. Basá riba e vishon mutuo i e dedikashon pa ehersé nan responsabilidat sosial ku EY Dutch Caribbean i JCI Dutch Caribbean ta kompartí, a disidí pa uni forsa pa huntu organisá e promé ‘fun walk’ di koló na Kòrsou ku e intenshon pa hasi esaki un evenemento anual. JCI (Junior Chamber International) Dutch Caribbean konosé 200.000 miembro aktivo rònt mundu entre 18 i 40 aña ku ta traha pa krea impakto positivo den nan mes komunidat.

No dañino pa medio ambiente

E kaminadat ta kuminsa i kaba ku un warm-up i cool down di Daniel Yung. Lokual ta hasi e kaminata aki diferente for di kaminatanan tradishonal ta ku lo tin 8 diferente stashon riba e ruta kaminda lo spùit e partisipantenan ku un puiru di koló ora nan pasa. Kada stashon di koló a ser realisá ku sosten di algun sponsor prinsipal, esta Maduro & Curiel’s Bank N.V., Subway, Fun Miles, Kooyman, Badia Coconut Water, un produkto di Pietersz Import, ACU, Digicel, Kurason pa Komunidad i Dasani un produkto di The Coca Cola Company. E splash di koló na final ta kortesia di SIXT rent a car i Curoil. E impakto di koló lo resaltá riba e t-shirt blankunan ku partisipantenan lo tin bistí. E substansha no ta dañino pa salú ni pa medio ambiente i por laba kita fasil.

Meta

Hinter Kòrsou ta invitá un biaha mas pa bin kana, kore, baila i gosa ku otro riba e ruta pa selebrá un estilo di bida salú i pa alabes duna un otro su bida tambe koló.  Kada persona ku partisipá tambe ta kontribui direktamente pa hasi bida di esnan ku mester di sosten den nos komunidat mas kolorido. E meta di Curaçao Color Walk ta pa rekoudá fondo pa otorgá na JCI Dutch Caribbean, EY Cares i Fundashon Desaroyo i Progreso. Fundashon Desaroyo i Progreso ta duna formashon despues di skol na 22 skol i kasi 2.000 mucha.

Inskripshon

Personanan di tur edat por partisipá; mucha (for di 4 aña), hende yòn i hende grandi, famia i grupo di amigu i kolega tur ta bon biní. Inskripshon lo tuma lugá dia 30 di mei di 10:00 am – 3:00 pm na Subway Brionplein i Kooyman Zeelandia, dia 31 di mei di 10:00 am- 3:00 pm na Subway Brionplein, i riba 1 i 2 di yüni di 12:00 pm te 2:00 pm i di 4:30 pm te 6:30 pm na Kooyman Zeelandia. Preis ta 15 florin pa mucha te ku 12 aña i 20 florin pa adulto i esaki por wordu paga ku Fun Miles. Tur partisipante lo haña un t-shirt koló blanku p’asina e kolónan resaltá. Durante e kaminata  lo parti awa i fruta, i lo por sigui fiesta ku ambiente musikal na enkargo di DJ Lu-C y MC Hype. Pa mas informashon i detayenan esklusivo bishitá e Facebook di Curaçao Color Walk òf mail curacaocolorwalk@gmail.com