Fundashon Motivá Guia I Protehá a hasi su entrada ku un aporte na enseñansa di Kòrsou na un manera masha bunita. Despues di a hasi sondeo kiko ta nesesidat nan di e pueblo di Kòrsou, Fundashon Motivá Guia I Protehá bou di maneho di Christopher de Wind a pone algun idea riba papel I a buska otro hóben nan ku e por a konvensé di su vishon pa tambe duna un man den esaki.  Fundashon MGP a hasi su mes konosí , den ménos ku un siman a hasi petishon na personanan individual i tambe kompanianan pa duna un man den un proyekto kaminda nan kier a yuda muchanan ku materialnan pa skol. Esaki nan a logr’é ku éksito i a repartí e materialnan bou di studiantenan ku tabata tin nesesidat. E idea aki tabata pa fundashon introdusí su mes ku komunidat di Kòrsou pero tambe ku e grupo di riesgo ku ta bai drenta un aña eskolar nobo. E studiantenan ku fundashon a logra otorgá materialnan pa skol, tin un tiki ménos preokupashon awor  i nan focus ta estudio. Awor  nan tin ku prueba fundashon  i tambe Kòrsou ku nan  ta bai pa un aña eksitoso. Un danki di kurason na tur instansha ku di un forma òf otro a yuda nos  i tambe kada persona individual ku a hasi e proyekto aki un éksito. Fundashon MGP lo ta un fundashon otro for di tur otro, importante  pa nan ta e hóben/ studiante. Pues pa e grupo aki e fundashon sigur ta un ku  lo laga su bos resoná. Fundashon  Motivá Guia i Protehá ta trahando kaba riba un konsepto ku pa nan  ta sumamente importante. Un konsepto kaminda studiante ta keda benefisiá di tur manera. Fundashon ya kaba ta trahando duru riba e konsepto aki  i ta bai kuminsá pronto kolekta informashon di studiantenan via un form online. Fundashon  ta spera di haña koperashon di studiante, paso pe grupo di studiante aki ta esun ku fundashon  lo traha. E konsepto aki no solamente lo traha ora tin problema den enseñansa pero e lo ta e inovashon ku studiantenan ta wardando pe. E proyekto aki lo traha tur luna  riba aktividat pa studiante kaminda tin workshop, charla, aktividat sosial i deportivo pa tur studiante paso studiantenan a duna di konosé ku aparte di estudio deporte ta karu  i  tambe aktividatnan ta tiki. Tin hopi idea pa logra ku e proyekto aki. Un deseo grandi ta hasi biahe nan di interkambio di estudio i kultura den otro pais na mundu.  Meta di esaki ta pa hasi e temporada di estudio plasentero i inolvidabel. Keda pendiente pa mas informashon di esaki.