Kòrsou ta sigui kere den Siman di Kultura. P’esei Kas di Kultura ta brinda hinter komunidat di Kòrsou e aña aki atrobe: Siman di Kultura !!. E fecha pa Siman di Kultura e aña aki ta 22  te ku 29 di Sèptèmber 2013. E grupo di enfoke pa Siman di Kultura ta pueblo di Kòrsou en general i spesialmente Bario. Algun di e barionan ku ya a indiká di lo partisipá aktivamente  na Siman di Kultura 2013 ta Westpunt, Mahuma, Wishi/Marchena, Koraalspecht, Kanga/Dein i Santa Rosa. E aña aki siman di Kultura su tema ta: ‘Di Abolishon pa Emansipashon’ i e liña kòrá ku lo kore den tur aktividat ta Pasado, Presente i Futuro. Kas di Kultura ta hasi un yamada na tur famia, bario, radio emisora, kanal di televishon, skol, empresa di gobièrnu,empresa priva, instituto, grupo kultural i artista pa “ Hasi grandi bo kultura i alsa bo Nashon” i kuminsá prepará pa Siman di Kultura 2013.

Durante Siman di Kultura 2013 Kas di Kultura ta:

– Pone atenshon dirigí riba diferente forma di manifestashon di Kultura di Kòrsou.

– Pone Atenshon na nos kultura di Pasado, Presente i Futuro.

– Apoyá bario, Famia, Organisashon i Artista pa Organisá evento kultural artístiko;

– Enfoká riba e tema ‘Di Abolishon pa Emansipashon’ pa medio di kultura i arte.

– Mobilisá hinter komunidat pa asistí na diferente evento i aktividat kultural;

– Stimulá union familiar rondó di kultura di Kòrsou.

– Promové i konsiensia kultura;

– Promové i stimulá Kultura di Kòrsou;

– Promové i stimulá Kreatividat;

– Promové union bou di tur suidadano;

– Garantisá e derechi universal di tur suidadano riba kultura propio.

Nos ke rekordá tur persona, instansia, i grupo pa manda nan programa di aktividat pa Siman di Kultura 2013. E lo sali den e programa di aktividat, ku Kas di Kultura ta bai imprimí. Di e manera aki tur hende por keda na altura di e aktividatnan ku lo bai tin durante di Siman di Kultura 2013. Manda bo programa te ku dia 12 di Sèptèmber 2013, na simandikultura2013@gmail.com i tambe via di fax na 461-7133. Kas di Kultura ta invitá hinter komunidat di Kòrsou pa “ Lanta nan kara i biba nan kultura pa huntu nos Hasi grandi nos kultura i alsa nos nashon”. Ban laga kultura di Kòrsou sigui brota den tur skina di Kòrsou, di 22 pa 29 di Sèptèmber 2013 selebrando 10 aña Siman di Kultura di Kòrsou!