Aeropuerto a ricibi su di 29 aerolinea. Lo opera 2 bes pa siman for di Bogota pa Aruba den un avion 737-700 cu capacidad di transporta  142 pasahero

ORANJESTAD, Aruba – 4 di december 2016: “Aeropuerto di Aruba ta masha contento di yama WINGO bonbini riba nos isla, den e prome vuelo di un cantidad cu lo sigui. Di nos banda lo traha duro pa esaki bira un relacion duradero y exitoso pa nos tur”, asina Jurgen Benschop, Chief Operations Officer di Aruba Airport Authority N.V. a duna di conoce durante un ceremonia special na ocasion di e yegada di e prome vuelo di WINGO diasabra atardi.

Jurgen Benschop a enfatisa cu na e momento aki Aeropuerto di Aruba ta conta cu 11 vuelo directo pa siman for di Colombia, banda di 11 vuelo indirectamente for di Colombia pa Aruba. Cu esey ta mustra claramente cu nos tin un cantidad di pasaheronan yegando for di dicho destinacion, cu de facto ta un bon hub tambe pa henter Latino America. WINGO pa Aruba ta nifica mas bien conexion directo cu Bogota, Colombia.

Separa di e C.O.O di A.A.A, tambe a hiba palabra e ehecutivo di WINGO, esta Carolina Gomez, cu a elabora riba e preparacionnan y e entusiasmo grandi di e aerolinea, cu apenas a inicia su vuelonan dia 1 di december ultimo. Nan ta orguyoso di a scoge Aruba entre nan prome destinacionnan y ta convenci cu e ruta lo ta exitoso. WINGO ta un “lowcost carrier” cu a start vuelonan idea y vuelta pa apenas $159,= for di Bogota pa Aruba.

WINGO ta bulando cu 4 avion Boeing 737-700 cu capacidad di 142 pasahero for di El Dorado International Airport na Bogota, Colombia. Nan a anuncia mesora vuelonan pa Aruba, 2 bes pa siman y varios destinacion den Colombia mes, Costa Rica, Cuba, Republica Dominicana, Ecuador, Guatemala, Mexico, Panama y Venezuela.

Riba e fotonan adhunto por aprecia momento di yegada na Aruba, den cual bomberonan a percura pa e saludo tradicional cu awa. Pa mas informacion bishita www.wingo.com pa iterinario, tarifanan y mas. WINGO ta uza e slogan “Una nueva forma de volar”.