Conde Nast Traveler’s Reader’s Choice Award 2013

WILLEMSTAD – Umbes mas por konkluí ku nos bishitantenan internashonal ta realmente enkantá ku Kòrsou. Resientemente e revista di biahe mas popular Conde Nast Traveler a presentá nan Reader’s Choice Award kaminda a nominá nos sentro di siudat Willemstad den Tòp 5 di e sentronan di siudat mas impaktante den Karibe. E lektornan di Conde Nast Traveler a keda realmente impreshoná pa e edifisionan di kolónan briante ku ta pone e toke outéntiko na nos sentro di suidat Willemstad. Ademas di esaki nan a ekspresá ku e merkado flotante tambe ta kontribuí na kreashon di e imágen perfekto di un isla karibense riku na historia, kultura i un sentro di siudat eksepshonal. Tur aña di nobo Conde Nast Traveler ta pidi su lektornan pa duna puntuashon na entre otro; paisnan, islanan, hotèlnan, resòrtnan, barkunan krusero i aerolíneanan.  Conde Nast Traveler a kualifiká nos sentro di suidat den un skal di 0 pa 100 kaminda nos a risibí e siguiente puntonan; kultura: 69.9, amabilidat: 74.3, ambiente: 73.1, restorantnan: 61.4, alohamentu: 65.3 i posibilidat pa hasi kompra: 57.4. E puntuashon total ku nos a risibí di Reader’s Choice ta 67.9. E puntonan aki a brinda Willemstad puesto 2 den e tòp 5  lagando atras St. John’s, Antigua na puesto 5, Oranjestad, Aruba na puesto 4 i Gustavia, St. Barts na puesto 3. E suidat di Hamilton, Bermuda a keda na puesto di honor. E puntuashon di Reader’s Choice ta djis un indikashon di e impreshon ku Kòrsou ta hasi riba bishitantenan internashonal. Desaroyo positivo den transporte aéreo, variedat den hotèl, bon servisio na huéspet, variashon di restorantnan di kalidat i nos kultura ta algun di e faktornan ku ta hasi Kòrsou e destinashon perfekto pa biaheronan rònt mundu i spesialmente esnan for di Nòrt Amérika. E nominashon aki ta indiká ku tur e esfuersonan ku ta wòrdu hasi  pa promové Kòrsou internashonalmente ta dunando resultadonan positivo. Pabien na pueblo di Kòrsou!