Fundashon Pro Bista ku tin komo meta pa revalidá, informá, konsehá, aktivá i re- integrá hende nan ku problema ku bista na Kòrsou ta kumpli e aña aki 15 aña di eksistensia. E di dos enkuentro organisá pa selebrá e lustro di kristal di e fundashon tabata e konsierto di Gospel dia 24 di mei último. E konsierto aki tabata un ku a mustra kon hende nan ku problema ku bista por presentá, toka, kanta dunando un peformashon profeshonal. Ku ayudo di diferente spònser i boluntario e anochi aki nan por mark’é den nan buki di éksito. Na e forma aki Fundashon Pro Bista kier  ta yama DANKI, BEDANKT, GRACIAS, THANK YOU, OBRIGANDO, MERCI, GRAZIE!!! Keda pendiente pa e selebrashon nan pa aña 2014 den luna di ougùstùs , aparte di nan tradishonal luna di Buzon, na diferente lokalidat ta bai tin:

–          dia 1 ougùstùs eksposishon di kuadro nan di Andre Nagtegaal ku nos kliente nan mes a traha,

–          dia  7 i 21 di ougùstùs nos “Dinner of Happy Hour in the Dark” (aki por reserva),

–          dia 17 di ougùstùs “Knock out di Domino” (si bo ta kere ku bo por duna e hende nan ku problema ku bista ‘sapatu’ mèldu),

–          dia 31 di ougùstùs “ After Luna di Buzon Happy Hour” (bini un bini tur).

–          E djasabra nan ta bai tin kolekta na e supermerkado i ‘megastores’ nan pero, ta bai tin kolekta èkstra riba e djadumingu nan ku peformashon di artista. Keda pendiente i si bo kier partisipá na un manera of otro pa e yuda e kousa, mèldu libramente nan e number di telefon 7379222, via mail info@probista.com of facebookpage : www.probista.com