Awe na Fusions i mayan na Licores Maduro

Djaluna último Fundashon Jazz Meet Cultures a tene un konferensha di prensa den kua el a duna tur informashon pa loke ta trata e edishon 2019 di e festival en kuestion.

Jazz Meets Cultures Festival lo konta ku presentashon di entre otro Tsean, Ataniro, Kantadó Mayó 2019 Adjatay Denisia, Junior Tecla, Menasa, Maarten Schakel, Mistica, Chaika, Reinier Lijfrock, Anairia Nivillac, front di Icons, Ray Lauffer i hopi artista mas kompañá pa Dennis Aalse i su Big Band.

‘Gimmick’

Komo muestra di apresio pa e aseptashon ku e festival a bin ta haña i tambe ku e deseo pa duna mas hende e oportunidat pa por disfrutá di e evento, a organisá 2 dia di ‘gimmick’ den kua lo bo haña karchinan di entrada na un preis redusí:

Awe djabièrnè e ‘gimmick’ lo ta den forma di un ‘Meet & Greet the Artists” di 6 pa 8 den Fusions na Saliña Galleries, unda banda di kumpra bo karchi, lo tin oportunidat di topa i interkambiá di vario di e artistanan partisipante.

Mayan djasabra lo tin e di dos i ultimo ‘gimmick’ na un di e partnernan di e festival, Licores Maduro, di 10or di mainta pa 1or di mèrdia.

Durante di e dos dianan aki, bo por haña karchi general na balor di fl. 50,- na lugá di fl. 65,-, i VIP na balor di fl. 150,- na lugá di fl. 175,-!

Benta di karchi

For di djaluna 8 di aprel, karchinan di entrada lo ta optenibel na su preis nòrmal na Beep Beep, 24 Uur uit de Muur, Mensing’s, van den Tweel Supermarket Zeelandia i Janthiel i tambe online riba website di Tickets Caribbean. Tambe tin oportunidat pa kumpra karchi ku bo ‘miles’ na ofisina di Fun Miles.

Karchi di VIP lo ta optenibel solamente via 540-0111.

Informashon

Pa kualke informashon di Jazz Meets Cultures 2019, por chèk su página di Facebook i tambe Instagram, bou di e nòmber JazzMeetsCultures, via email na info@jazzmeetscultures.com òf tambe via di e number di telefon 540-0111