WILLEMSTAD – E fin di siman tras di lomba, e agrupashon musikal WESU Salsa Dura a kuminsá manda un Son Montuno promoshonal radionan lokal. Ta trata aki di un piesa original di Leo Dan ku a keda tradusí na papiamentu.

E kansion aki ta titulá “Mari mi amor” ku a keda kanta pa e konosido kantante Gerald “GT” Torregorsa. Esnan ku a haña oportunidat pa skucha e piesa aki por a sinti ku a dediká tempu den e kansion aki, no solamente e tradukshon, pero tambe ku un bon areglo di Hector Sampson i mas ku tur kos ta trata aki di un grabashon fini.

WESU ta un agrupashon musikal establesé aki na Kòrsou ya pa algun aña ku ta dominá músika platina, pa ser eksakto e género di salsa.

Hustamente pa e merkado lokal, WESU ta lansa un grabashon promoshonal pendiente di su promé CD ku lo mester subi merkado den luna di novèmber ku algun kansion i komposishon nobo.

Dentro di poko lo tin un video clip di WESU ku e tema aki. Na e momentunan aki ta finalisando e script pa asina ei kuminsá filma.

Na nòmber di WESU e kansion aki ta bai dediká na tur hende muhé na Kòrsou i mundu ku yama Mari.