WILLEMSTAD/ Un paréntesis interesante pa rapper yu di Kòrsou Jaido sigur ta e featuring resien ku rapper ulandes, Webb.  E rapper ulandes ta firmá ku kas di produkshon ODG na Ulanda i ta kasi sigur ku fanatikonan den urban konosé su kolaborashon ‘Masoko’ ku Mula B i Bartofso. E’la figurá tambe riba e track ‘Tournevis’. E rapper di Den Haag awe ta figurá e yu di Kòrsou Jaido riba su mas resiente ‘single’ titulá ‘Sinds Klein’.

Esaki ta e promé ‘feature’ di Jaido den merkado urban na Ulanda. E track mes ta papia di temanan ya komun den bida ‘underground’, yega metanan finansiero te ora yega e nivel di bida deseá. Jaido por haña su mes perfektamente de e piesa. Riba su mes un artista kontraversial, meskos ku kualke otro ‘rapper’ internashonal. Resientemente Jaido tambe tabata tin su ‘share’ di notisia den páginanan ku no tin nada di haber ku farándula. Jaido ta flankiá ku éksito i sigur for di 2016 pa 2018 tabata un di e artistanan urban mas solisitá. Éksitonan manera Speed (595k views), Bai Pafó (288k views),  Kla Pe (547k views),  Bazooka huntu ku Rich Kalash (352k views), i Mary J tambe ku Rich Kalash ku a surpasá 1 mion views ta prohibí pa lubidá.

Decoded ta anunsiá ku Jaido pronto  lo ta lansando su promé EP pa merkado di Ulanda. Fanátikonan por sigui Jaido riba su Facebook, Instagram i SnapChat @jaidorick. Tur artista di Decoded por wòrdu siguí riba e Youtube Channel @decodedofficial. Por stream e piesanan riba iTunes, Spotify, Tidal i Apple Music tambe.