A resulta un èksito aki na Kòrsou Obra teatral di Richailine Elisa

Willemstad, Den e siman di 30 di novèmber pa 4 di dézèmber e obra 

“ Wachten op mijn Papa” a keda presenta na diferente skol sekundario aki na Kòrsou ku debate na final tokante e tema nan ku a bin dilanti den e obra.

“Wachten op mijn Papa” ta un obra teatral skibí i dirigí pa Richailine Elisa nasé aki na Kòrsou i a gradua na “De Acteerschool Rotterdam” den e mundu di aktuashon i na “Hogeschool Rotterdam” komo Trahado Sosial.

E obra ta bai tokante dos mucha muhé: Bieke (Priscilla Hijnen ) i Gaby (Shulayndra Poulina) ku kada un sinta na un parke ta warda riba un persona importante. Esaki ta nan tata biológiko. 

Bieke tin 15 aña sin mira of tende di su tata pero porfin su tata ke mir’é i papia kuné.  Gabi nunka a konosé su tata, diripiente e la risibí un karta ku su tata a mand’é pe. E dos mucha muhénan aki no konosé ni a topa otro promé pero destino i e historia ku nan tin den komun a trese nan huntu. Debí ku kada un tin ku warda riba e persona importante. Kombersashon entre nan dos ta kuminsa. 

E siman di e presentashonnan tabata emoshonal, konfrontativo i edukativo. Mayoria mucha a haña difisil pa papia tokante di nan emoshonnan.

Richailine i su team a mira kon importante i ki impakto tipo di obranan sosialnan por tin riba nos hóbennan i sigur den nan formashon.

Danki na Prins Bernhard Cultuur Fonds i sobra sponsernan, e obra ‘Wachten op mijn Papa’ a keda presentá na diferente skol sekundario.

Mas di un total 250 hóben por a disfruta i debatí riba e tematika di e obra. 

Richailine Elisa ta sumamente kontentu ku e aseptashon di e obra na skolnan, tantu bou di hóbennan komo maestronan. Lastimamente no por a presente pa publiko general, esaki debi na e medidanan di Covid-19 pero sa si ku lo tin mas obra ku tematikanan sosio-kultural na Kòrsou skibí i dirigí pa su persona.