Spantenbier na Nicolaas Store

Recientemente a celebra Spantenbier unda a yega na e punto mas halto di e restauracion di Nicolaas Store. Restauracion di Nicolaas Store ta un di e partinan mas principal pa locual ta trata e desaroyo y henter un vision cu tin pa San Nicolas. E tabata un trayecto di 3 aña di planificacion y awor porfin cada pida puzzel ta hayando su luga. Nos por mira un watertoren cu awor ta den e fase di wordo muebla, y asina e comberti den e museo industrial. Nicolaas Store na su turno ta bay bira e “Community Museum” cu na mes momento ta e curason di henter e atraccion cu San Nicolas ta bay bira.

Un vision cu Minister Oduber tin y a inicia varios proyecto caba. Un di cual ta e Aruba Mural Projects cu ya caba ta drentando su segundo fase. Un otro proyecto ta embeyecemento di caya principal na San Nicolas. Minister Oduber ta comenta: “Ya caba nos por menciona cu Arubaanse Wegenbouw lo ta e contratista encarga cu e prome fase cu ta e area di Promenade. Por spera un caya principal bunita cu diferente caminda pa sinta cu dak, full na klinker y cu iluminacion apropia. Esaki sigur lo cambia full e cara embeyeciendo e area pero tambe lo tin su contribucion na e aspecto di siguridad.”

E mandatario a sigui comenta cu un otro monumento cu tambe pronto lo haya su atencion ta Uncle Louis Store. “Gobierno a tuma e decision cu lo bay renoba esaki pa ubica Departamento di Cultura na San Nicolas. Tambe e fundacion CRAFT cu ta e fundacion di artesanonan cu ta bin cu un espacio specifico pa nan por traha nan obranan, y asina por sigui menciona mas inversionnan priva tambe cu ta biniendo San Nicolas.”

Minister Oduber ta entusiasma pa mira tur esaki tuma luga un logro di tur e stakeholdersnan. E ta sigui bisa: “Pa otro aña mey mey di aña hunto cu ATA, lo inicia cu e promocionnan pa atrae e turistanan bishita San Nicolas, pa bo por haya un desaroyo grandi y crea e efecto pa mas negoshi pariba aki na San Nicolas.”