WILLEMSTAD/KRALENDIJK – Awe ENNIA Caribe Holding NV (ENNIA) i VIDANOVA Pensioenfonds (VIDANOVA) a anunsiá firmamentu di un konvenio definitivo pa VIDANOVA atkerí e aktivo i negoshinan di e filial di ENNIA na Boneiru. No a divulgá e suma di atkisishon. E filial, ku ta representá 3% di e aktivo total di ENNIA, ta enserá e empresanan di Banco di Caribe, ENNIA Leven NV i ENNIA Schade NV na Boneiru.

Señor Humberto d’Abreu de Paolo, Presidente di e Hunta di Direktiva di VIDANOVA a bisa: “Nos ta kontentu ku e atkisishon aki ku tin un rekòrt di éksito konsiderabel na Boneiru. Nos ta yama gerensia i empleadonan di e filial bon biní serka VIDANOVA. E atkisishon aki ta un ekselente oportunidat pa ekspandé nos servisionan finansiero integrá na nos miembronan”.

Señor Ralph Palm, Presidente i Gerente General di ENNIA, a deklará: “Nos ta kontentu ku e transakshon aki ku ta brinda e empleadonan di nos filial na Boneiru e oportunidat pa sigui den nan funshon aktual òf un posishon komparabel despues ku finalisá e transakshon aki”.

Señor Palm a agregá: “E paso aki ta pèrmití kompanianan di Grupo ENNIA pa maksimalisá e balor di nos potensial manehando e rekursonan di e grupo. Nos ta gradesido pa e oportunidat di por a sirbi nos klientenan na Boneiru den kurso di añanan, i nos ta gradisí e outoridatnan pa nan respaldo kontinuo na Boneiru, i meskos tambe nos empleadonan ku ta traha duru i dediká”.

E transakshon, ku ta pendiente ainda di aprobashon supervisor, lo keda formalisá segun espektativa pa fin di yanüari 2018.