WILLEMSTAD – Durante di e aña koriente Vidanova ta selebrá su di 50 aña di eksistensia. Ya for di su inisio e fondo di penshun tabata operashonal riba e seis islanan di loke tabata Antia Hulandes. Loke a kuminsá komo e fondo di penshun pa 8 kompania di sektor energetiko, awe ku orguyo ta anunsiá ku mas ku 70 kompania/fundashon tin un areglo di penshun pa nan empleadonan na Vidanova. “Nos ta hopi agradesí pa e konfiansa di kada un di e organisashonnan dunadó di trabou aki i kada un di na empleadonan. Pa e motibu ei nos ta selebrá tur e logronan di 50 aña na kada un di e sinku islanan kaminda Vidanova ta brinda su produktonan di penshun, “ sra. Charlene Alberto, CEO di Vidanova a bisa.

Durante e fin di siman di 8, 9 i 10 di Yüni Vidanova a organisá eventonan di selebrashon pa su partisipantenan i penshonadonan na Isla Ariba. Na kada un di e islanan aki Vidanova a hasi donashon na instansianan ku ta hasi trabounan hopi valioso riba tereno sosial.  Na Statia a hasi donashon na Sint Eustatius Housing Foundation, na Saba na Saba Lions Foundation i na Sint Maarten na  Community Outreach Mentoring and Empowerment International Center (C.O.M.E.)

Durante di e fin di siman ultimo Vidanova a selebrá ku su penshondanonan i partispantenan di shete instansia na Boneiru ku tin areglo di penshun na Vidanova. Durante di e enkuentro festivo a hasi donashon na Fundashon Cocari, ku ta hasi trabounan  valioso pa e komunidat Boneriano.

Djasabra awor ta toka turno na kasi tres mil empleado di kompanianan i fundashonnan di Kòrsou. E selebrashon aki ta tuma lugá den oranan tempran di anochi na Museo Kòrsou. Pa e okashon aki tambe nos lo hasi un donashon na un instansia. “Nòmber di e organisashon aki nos ta tene un ratu mas sekreto, pero ya pa djasabra anochi e lo ta anunsiá via tur media,” sra. Alberto sigui informá. “Nos ta hasi un yamada na tur partisipante pa pasa na nan kompania pa tuma nan karchi di entrada pasobra manera nos a ekspresá na e otro islanan, na Kòrsou tambe nos ta bisa huntu nos a logr’é, huntu nos ta selebr’é.”