CTB hasiendo promoshon internashonal pa nos hotèlnan:
WILLEMSTAD- 17 di yüni 2013:- Esaki ta e temporada ku práktikamente tur hotèl den region ta dediká na mantenshon, p’asina prepará nan mes pa dianan di zomer i bishitantenan ku ta buk nan pasashi pa disfrutá di nan ‘summer vacation’ huntu ku nos na Kòrsou. Resientemente Ofisina di Turismo di Kòrsou (CTB) a pone lus den medionan di komunikashon internashonal riba tur hotèl ku ta den preparashon pa e próksimo temporada. Kòrsou su industria di hospitalidat ta kontinuamente mehorando i kresiendo pa por ofresé e kambernan di hotèl di mas moderno ku servisionan ku ta hasi eksperensia di e turista mas plasentero i inolvidabel. Nos ke pa nos bishitantenan disfrutá plenamente di tur loke nos isla bunita tin pa ofresé, for di kambernan nobo, esnan remodelá te ku restorantnan nobo i servisionan di ‘tour’. Tin algu na Kòrsou pa kada un huéspet internashonal. Hotèlnan ku ta inkluí propiedatnan nobo ta; Papagayo Design Hotel, Beach House Curaçao i Piscadera Harbour Village. Esnan ku a wòrdu resientemente remodelá ta Hilton Curaçao, Floris Suite Hotel, Lions Dive & Beach Resort, Otrobanda Hotel & Casino i Sunscape Curaçao Resort, Spa & Casino. CTB ta di opinion ku mester keda pone ‘focus’ riba tur rekonosementu di Kòrsou internashonalmente, esaki ta plataforma ideal pa keda atraé turista i lansa kampañanan promoshonal. Kòrsou a keda selektá na 2012 komo un tòp destinashon dor di Frommer’s, tambe a risibí un rekonosementu komo un di e 5 islanan den Karibe pa wòrdu eksperensiá i deskubrí dor di e biahero internashonal segun Budget Travel i ademas di esaki nos a keda den e tòp 3 di ‘2012 Honeymoon Hot Spot’ dor di Condé Nast Traveler. Kòrsou su 35 playanan bunita ta tópiko di biahero nan internashonal i na 2011 a keda inkluí den e lista di ‘Top 10 Beach Destinations’ di SmartTraveler.
Promoshon Internashonal “Curaçao Experience”:
Un di e esfuersonan pa sigui promové Kòrsou internashonalmente ta e kampaña resien lansá dor di Ofisina di Turismo di Kòrsou, na unda ku e turista lo mester kompartí su eksperensia di Kòrsou riba e websáit, www.AFAR.com/curacao. E websáit aki ta motivá e biahero internashonal pa eksperensia kada destinashon na un otro manera, un poko mas profundo di forma ku e ta sera konosí ku kultura, sitionan históriko i kustumber di e pais. Pa e turista partisipá e mester registrá ‘online’ i kompartí algu di su eksperensia na Kòrsou. For di tur esnan ku registrá, tin chèns pa un di nan gana un vakashon pa Kòrsou.