Willemstad, 4 aprel 2013 – United Telecommunication Services (UTS) un biaha mas ta bolbe  ofresé pueblo di Kòrsou mas balor i internèt di spit haltu, pero na e mesun preis ku nan ta pagando kaba.  UTS ta bon konsiente di e importansia i demanda pa akseso na internèt di spit haltu den nos komunidat.  Den e kuadro aki nos kompania di telekomunikashon, entrante 5 di aprel próksimo, ta kuminsá ofresé paketenan di spit máksimo mas haltu na su usuarionan, i usuarionan lo keda paga e mesun preis pa luna ku aktualmente nan ta pagando kaba.  Na mes momentu lo fleksibilisá kòntraktnan pa usuarionan di DSL i paketenan di Double i Triple play. Na kaminda pa hasi e spitnan máksimo mas haltu aki aksesibel pa su klientenan, UTS ta regalá usuarionan e posibilidat di konekshon grátis ilimitá di nan telefòn fiho pa un otro telefòn fiho di UTS i den algun kaso hasta konekshon grátis ilimitá entre nan telefòn fiho i un Chippie, te na e momentu ku e usuario por risibí e spit máksimo di internèt ku el a apliká pe.

 Mas balor i mas spit

UTS, entrante 5 di aprel próksimo, ta kuminsá ofresé su klientenan, ku aktualmente por disponé di spit máksimo di 4 Mb, un spit máksimo di 6 Mb, esnan ku ta risibiendo spit máksimo di 16 Mb lo risibí un spit máksimo di 32 Mb, miéntras ku esnan ku tin aktualmente un spit máksimo di 26 Mb, lo risibí un spit máksimo di 50 Mb.  E usuarionan lo risibí e spitnan máksimo pagando e mesun montante pa luna ku aktualmente nan ta pagando. Pa e kliente por gosa di e spit máksimo aki, UTS a entamá un proyekto grandi pa perkurá pa e konekshon te kada kas ta apto pa garantisá e spitnan haltu aki.  UTS, durante di un periodo, lo ampliá su kantidat aktual di 300  kabinètnan pa 1000 kabinèt, plùs lo kambia su modemnan pa un modelo nobo i moderno. Miéntras ku e operashon grandi aki ta tuma lugá, UTS ta regalá su klientenan e posibilidat pa yamada pòrnada.  Klientenan ku konekshon di ADSL ta risibí e posibilidat di hasi yamada di un telefòn fiho pa un otro telefòn fiho riba e ret di UTS, kompletamente grátis i ilimitá.  Klientenan ku ta gosa di e paketenan Double i Triple Play, banda di por yama telefòn fiho di UTS pòrnada, awor lo por yama un Chippie tambe kompletamente grátis i ilimitá.  Tur esaki, miéntras e kliente ta warda su turno pa keda konektá di tal forma ku e ta risibí konekshon na e spit máksimo ku el a aboná pe.  Esaki ta algu ku UTS so por ofresé i ta un forma pa gradisí su klientenan pa nan konfiansa.

 Kòntraktnan simpel i fleksibel

Entrante 5 di aprel próksimo, UTS lo fleksibilisá su kontraktnan pa konekshon di ADSL i esnan di su paketenan Double i Triple play.  UTS lo tin dos tipo di akuerdo so, esta un ku no ta mará na un tèrmino di tempu i un akuerdo pa 1 aña.  Un kliente ku sera un akuerdo ku no ta mará na un tèrmino di tempu, por terminá su kòntrakt kualke momentu, basta e hasi notifikashon di esaki un luna delantá.  E preisnan pa esnan ku sera un kòntrakt pa 1 aña, ta aun mas atraktivo ku esnan ku ta gosa di e servisio sin tin un kòntrakt mará na tempu fiho. Esnan ku sera kòntrakt pa 1 aña lo por terminá nan kòntrakt na kualke momentu, pero nan ta risibí un rekargo igual na tres luna di abono.  Na momentu ku e kòntrakt ta bai terminá, nan mester notifiká UTS un luna delantá, promé ku e fecha ku e kòntrakt ta finalisá.  Sin notifikashon, UTS lo prolongá e kòntrakt pa 1 aña. Kòntraktnan eksistente ta ser prolongá pa un aña bou di e tèrminonan nobo mas simplifiká.  E tèrmino nobo ta aplikabel pa esnan ku nan kòntrakt a keda renobá un òf mas biaha entretantu.