Willemstad 20 di aprel 2017 – Nos ta atrobe den temporada di Elekshon i meskos ku e biahanan anterior, UTS a bolbe tuma nota di reklamonan di klientenan ku ta kere ku ta UTS ta dunando sierto partidonan polítiko nan numbernan di telefòn pa nan manda nan sierto mensahenan pa hiba nan kampaña polítiko.

Esaki NO ta kuadra ku realidat i UTS no ta kontribuyendo den ningun forma ku esaki. E partidonan polítiko aki ta hasi uso di sierto sistemanan robòt, purbando tur ‘reeks’ di number ku ta eksistí (por ehèmpel di 5100000 te ku 5999999 etc.) i wak kua ta pasa òf no atraves di sea ta yamada, WhatsApp òf SMS.

Mester bisa ku UTS no por stroba ningun kliente di risibí yamada òf SMS, pero na momento ku UTS tuma nota ku ta malusá su ret di telekomunikashon, e lo aktua mesora severamente kontra e personanan ku ta hasi esaki.

Pa UTS, privasidat di su klientenan ta algu hopi sagrado i semper lo perkurá pa protehá esaki.