Willemstad 26 novèmber 2013 – Nos merkado di telekomunikashon ta kambiando konstantemente. Kompetensha, dia pa dia, ta bira mas intensivo. Esaki kombiná ku kambionan teknológiko, patronchi di konsumo di e kliente i desaroyo di loke nos ta yama e-economy, ta obligá United Telecommunication Services (UTS) pa ahustá su kostonan, inkluso di personal den servisio di UTS.  Desde 2006 ya tabata opvio ku UTS mester kontené i hasta redusí e kantidat di personal den su servisio, komo tal e tabata stipulá kaba den UTS su plan stratégiko. E kompania despues di hasi un kantidat di ehersisio pa redusí su otro gastunan ku no ta di personal, awor a yega e punto ku e mester redusí su personal pa por oumentá su posibilidat di sobrebibensia di nos kompania di telekomunikashon. UTS na e momentu aki tin mas ku dòbel e kantidat di empleadonan (600) den su servisio kompará ku tur su kompetidónan kombiná (no mas ku 250.)  Komo tal, redukshon di personal ta un faktor importante pa rationalisá e kostonan di UTS.  Ta pa e motibu aki UTS a inisiá un ròndu voluntario pa empleadonan por skohé pa baha ku “wachtgeld.”  Dado kaso no logra e kantidat deseá di personal ku ta baha boluntariamente, e kompania lo mester rekurí na e proseso pa baha personal obligatoriamente entrante yanuari pròksimo. Kompanianan di telekomunikashon rònt mundu na e momentu aki ta redusiendo personal, Hasta serka kompanianan grandi manera KPN, Vodafone, AT&T i Belgacom ta redusiendo nan personal.  Den kaso di UTS, ya for di den e plan empresarial di 2006 klaramente por tuma nota ku mester redusí e kantidat di personal.  E plan di rekurso humano tabata indiká ku tin un bon kantidat di personal den servisio di UTS, ku no tin e preparashon nesesario pa atendé ku e teknologia moderno.  P’e motibu aki a proponé pa redusí, kambia i trein personal. UTS a bin ta plania e redukshon di personal for di ougùstùs 2012 i debí na elekshon, UTS no a lag’é bai dor mas. Informashon tokante di esaki a keda tratá durante dos reunion di akshonista.  Despues UTS  a yama dos reunion di akshonista, pero tur dos a keda kanselá. Gerensia di UTS mas aleu a aserká Hunta di Komisario i a pidi aprobashon plùs e fondonan nesesario pa por realisá e ròndu boluntario.  A informá sindikato debidamente  i sindikato a bai di akuerdo ku e proposishon. Den e protokòl di 2008 a stipulá ku UTS por tin un kantidat máksimo di 690 personal den servisio di kua 445 den servisio permanente.  Na 2012, komo resultado di un lucha obreril (akshon Cova), UTS a keda obligá pa tuma 48 empleado ku tabata den servisio di Paytel, un kompania yu di UTS, meskos ku 34 uitzendkracht.  Den kuadro di redukshon di gastunan a stòp tambe trabounan di instalashon,  realisá pa kontratistanan, ku tabata nifiká un peso di 4.7 mion pa aña. Na su lugá a tuma 16 monteur den servisio.  Esaki awor ta kosta e kompania 1.8 mion pa aña.  Na e momentu aki UTS tin un total di 607 empleado den servisio di kua 505 ta den servisio permanente.  Si no a tuma e kantidat di 82 persona na 2012, awe lo tin 423 empleado den servisio permanente di UTS. UTS mester krese pa e por ta un empresa stabil i duradero.  Pa UTS krese e mester partisipá den negoshinan ku ta kuadra ku su área di operashon òf e mester subi merkadonan nobo.  Uniqa p.e. tabata un invershon stratégiko pa UTS, pero akshonista no a karga e proyekto i e tabata hopi biaha un víktima di polítika.  Na 2012 un delegashon di parlamentu a bishitá e kompania.  Entretantu Minister a duna òrdu pa sea buska moda pa e rekuperá òf mester bendé.  P’e motibu aki a kana un proseso transparente di destaho pa benta di e kompania.  Dos kompania a mustra interes pa kompra.  Mesun proseso transparente a kana tambe pa benta di e operashon di UTS na St. Kitts. UTS su partisipashon den CTEX tabata basá riba e pensamentu ku presensia di e sentro di data aki lo trese negoshi supstansial for di kompanianan establesé den e sentro di data, debí ku  nan mester hasi uso di e infrastruktura i servisionan di UTS.  Esaki ta nifiká mas entrada pa UTS.  UTS a imbertí 5.5 mion dòler den CTEX.  Ta bon konosí ku lamentablemente no ta serka tur koriente polítiko e proyekto aki a haña sosten nesesario.  UTS entretantu a haña un kumpradó pa su akshonnan, di tal forma ku UTS ta logra saka su invershon, pero ta mantené tur derecho i benefisionan ku e tin komo provedor di servisio na e kompanianan establesé den e sentro di data. UTS, no opstante e ehersisionan aki, por forma parti di esfuersonan pa stimulá nos ekonomia dunando un impulso na desaroyo i kupo di trabou.  Den e próksimo añanan UTS mester desaroyá su infrastruktura di fibra óptiko pa kas (Fiber to the home.)  Un proyekto mayó asin’aki, aparte di ta un invershon grandi, ta krea tambe trabou pa un kantidat di hende den e próksimo 3 añanan.   E proyekto aki únikamente por bira posibel sinembargo basta tur aktor, inkluso akshonista, koperá p’e keda realisá.