WILLEMSTAD 18 yanüari 2016 – UTS ta sigui kontribuí na nos komunidat pa medio di un bunita gesto, regalando tres instansia e pakete di Pay Per View, p’asina nan tambe por sintonisá i disfrutá di Festival di Tumba 2016.

Temporada di Karnaval 2016 a ranka sali i pueblo di Kòrsou tin ekspektativanan haltu pa loke ta trata Festival di Tumba i Karnaval i netamente p’esaki, UTS komo un di e Branding Partnernan di Tumba i un di e spònsernan prinsipal di Karnaval, ta regalá tres instansia e pakete Pay Per View di TDS, spesialmente p’e siman di Tumba. Ta trata aki di SEHOS i dos kas di grandi, kual ta Huize Habaai i Nos Lanterno.

”Nos ta sumamente kontentu di por fasilitá i alabes alegrá kurason di personanan, ku di un manera òf otro no por akudí na Festival Center, ku e oportunidat pa nan tambe por gosa di Festival di Tumba 2016 kaminda ku nan ta. E ta yena nos ku satisfakshon di por duna nos aporte kaminda mester, p’asina yuda halsa kalidat di bida di nos siudadanonan”, señor Paul de Geus, direktor di UTS, a bisa.

SEHOS, un organisashon ku ta traha sumamente duru tur dia di nobo, pa duna e mihó servisio na tur ku ta interná i ta eksperensiando difikultat ku salú. Apesar di e situashon ménos plasentero ku pashèntnan por ta pasando aden, UTS ta sigur ku disfrutando di Festival di Tumba lo yuda nan distraí nan mente i hasi nan estadia den hospital muchu mas agradabel. UTS ta kere firmemente tambe ku e ambiente karnavalesko i en partikular esun di Tumba, ta sòru pa un mente i bida sosial mas plasentero pa nos habitantenan di Huize Habaai i Nos Lanterno.

UTS ta deseá henter pueblo di Kòrsou un felis siman di Tumba i un dushi temporada di Karnaval i ta spera ku kada un di e tres instansianan aki keda deleitá riba tur kuater anochi di Festival di Tumba 2016.