WILLEMSTAD 7 yanüari 2016 – United Telecommunications Services (UTS) huntu ku e plataforma musikal optenibel riba internèt, esta Skempi, a formalisá un kolaborashon eksklusivo na aprel 2015. E kolaborashon a keda anunsiá públikamente den luna di yüni durante e inougurashon ofisial di Chippie su logo nobo huntu ku introdukshon di e kampaña ‘Chippie is more’. Pa medio di e kolaborashon aki, UTS ta komplementá su servisionan prinsipal di liña fiho, televishon digital, internèt i tambe servisio mobil ku un komponente popular: músika. UTS a opta pa kolaborá ku Skempi p’e hecho ku buska i skucha kantika ta un di e aktividatnan riba internèt ku más ta ser praktiká bou di klientenan di tur edat. Skempi ta un plataforma riba internèt dediká na proveé artistanan lokal un plataforma di músika sentralisá, p’asina nan kantikanan por keda skuchá rònt mundu. E plataforma ta ofresé un ‘data base’ ekstenso di tantu kantikanan bieu komo kantikanan nobo di músikonan lokal. Na momentu ku bishitá e wèpsait, por disfrutá di diferente piesa di nos artistanan lokal manera entre otro Doble R, Macario Prudencia, Rudy Plaate, pero tambe esnan kontemporáneo manera Dongo, Gentz, Shamiro Anita i Aemy Niafeliz.

Pa un kompania di telekomunikashon i un plataforma di músika djòin otro pa un kolaborashon, ta algu relativamente nobo riba nos isla, sinembargo esaki ta birando mas i mas un fenómeno global. Na Oropa plataformanan riba internèt manera Spotify, Deezer i Netflix, tambe a sera akuerdonan similar ku kompanianan di telekomunikashon manera Vodafone i T-Mobile. Den Latino Amérika, kompanianan di telekomunikashon tambe a kuminsá adoptá e era digital, kaminda por ehèmpel Tigo a kuminsá traha huntu ku Deezer. Na un forma similar, klientenan di UTS ta bai kuminsá risibí akseso preferensial na músika Karibense den Chippieland:Kòrsou, Boneiru, Saba, Sint-Eustatius, i e parti Hulandes i Franses di Sint Maarten. Huntu, UTS i Skempi ta bai lansá un kantidat di servisio eksklusivamente pa su klientenan i den nan entre otro e ‘mobile app’ di Skempi, kual lo bai ta eksklusivamente disponibel pa usuarionan di Chippie. Adishonalmente, Skempi ta bai fasilitá tur músiko independiente den Karibe un ‘dedicated artist account feature’ dunando nan asina mas ‘power tools’ pa publiká i manehá nan propio kantikanan. Por bishitá Skempi su wèpsait na www.skempi.com.

UTS su meta ta pa kontinuamente ofresé su klientenan mas tantu benefisio posibel. Dor di ofresé benefisionan adishonal manera Fun Miles i awor tambe Skempi, UTS ta distinguí su mes for di su kompetidónan, komo ku servisio di telekomunikashon a transformá di tal forma ku ya no ta mira esaki mas komo un simpel produkto òf servisio, sino komo un aspekto esensial den bida diario di kada persona. Pa mas informashon tokante tur produkto i servisio di UTS bishitá www.uts.cw