WILLEMSTAD 15 sèptèmber 2016– Despues di un periodo satisfaktorio trahando huntu, UTS i Fundashon Desaroyo Deportivo Kòrsou (FDDK) ta prolongá nan akuerdo mutuo na bienestar di desaroyo di deporte riba nos dushi isla Kòrsou.

Ku sumo plaser UTS ta kontinuá den un kolaborashon estrecho ku FDDK, pa huntu sigui duna un man na formashon di nos hóbennan. Ta un realidat ku mas tantu un persona ta praktiká deporte, mas mihó e por presta na skol òf trabou. Un otro aspekto ku tambe ta hopi importante, ta ilustrá ku un persona ku ta move regular ta biba un bida mas saludabel. Pa entre otro e motibunan aki mes ta importante pa ekstendé e plan pa restourá i mantené áreanan deportivo kaminda nos hendenan por praktiká nan deporte faborito sin ningun limitashon. Aparte di stimulá moveshon físiko den tur bario, UTS ta deseá na duna tur hóben deportista e oportunidat ku nan meresé pa perfekshoná nan mes i bira por ehèmpel entre otro e siguiente Liemarvin Bonevacia, Churandy Martina, Andrew Jones etc. Fresku ta ainda den nos memoria, e kampaña olímpiko, “Dream, Believe, Achieve”, ku UTS i FDDK a hiba huntu, p’asina sostené Liemarvin Bonevacia den su kaminda pa Rio 2016.

E kombenio aki sigur ta hasi posibel pa aki un par di aña, Kòrsou por proveé un kantidat muchu mas grandi di deportistanan profeshonal ku por representá nos pais riba nivel internashonal. Ku tempu, mas i mas siudadano ta realisá e importansia di biba un bida salú, sea pa persiguí un karera profeshonal òf simplemente pa mantené un bon kondishon. Pa esaki por ta posibel ta esensial pa mas instansia òf eksperto kuminsá ku inisiativanan similar pa logra krea un impakto mas grandi i positivo.

Di parti UTS, nos ta kontentu i orguyoso di por duna nos aporte na momentu ku ta trata di desaroyo di nos komunidat i mas ainda, si esaki ta dirigí riba alsa kalidat di bida di nos siudadanonan.