Willemstad, 4 aprel 2013 – United Telecommunication Service (UTS) ta para mei mei den nos komunidat i ta bon konsiente di puntonan kritiko ku su klientenan tin riba su produkto i servisionan. UTS na promé lugá ta pidi diskulpa pa kualke inkumbiniensha ku algun di e desperfektonan aki por a kousa na su klientenan. UTS na mes momentu ke aklará i splika esfuersonan ku e kompania ta hasi pa mehorá e situashonnan aki.
OneNet awor ku kapasidat pa warda mail di 100 Megabit
UTS resientemente mester a remplasá su server ku ta sostené su servisio di OneNet. Tin un dicho ku ta bisa “no hay mal que por bien no venga”. UTS a hasi uso di e situashon aki pa bai over riba un sistema nobo, muchu mas amplio i moderno. E sistema nobo aki tin un ‘interface’ muchu mas fásil i plasentero pa usa ku muchu mas opshon. Aparte di esaki, UTS a amplia e kapasidat kaminda kliente ta warda su datonan di 15 MB pa 100 MB, p’asina klientenan por hasi uso muchu mas amplio di servisio do OneNet e-mail. UTS dor di introdusí un filter di spam mas potente a resolvé tambe e problema di spam ku a surgi.
Prevenshon di sobre-uso lokal di 4G
Resientemente a bin ta presentá su mes kasonan di klientenan di 4G ku sobre-uso di e servisio den tal ekstremo ku chèns ku nan ta akumulá un kuenta ekstremadamente haltu; e kasonan di asina yamá ‘billshock’. Mester enfatisá si ku na promé lugá e responsabilidat pa ku uso di un servisio ta di e kliente mes. Sinembargo, UTS ke yuda e kliente mas tantu ku ta posibel. P’e motibu aki, UTS tin algun fasilidat ta ofresé di tal forma ku e kliente mes por kontrolá su uso. Na promé instante no ta kobra sobre-uso riba e promé resibu ku bai pa e kliente. E kliente mes por tuma nota di su uso i modifiká esaki den futuro. Entrante 5 di aprel, e kliente mes por wak tur detaye di su kuentanan residenshal fásilmente dor di bai riba www.uts.cw i klik riba miuts. Ademas e kliente ta risibí awor un notifikashon via SMS dos biaha pa dia na momentu ku e usa mas ku e kapasidat máksimo ku e tin. E ta risibí un notifikashon via SMS dos biaha pa dia ku e kapasidat ku el a surpasá su límite. UTS, pa baha e peso di e sobre-uso, a redusí su tarifa di 35 sèn pa kada Megabit di sobre-uso pa 15 sèn pa kada Megabit na sobre-uso. UTS ta ofresiendo klientenan ku ta den e situashon ku nan risibí un kuenta di sobre-uso haltu, esta e kasonan di ‘billshock’, un solushon atraktivo pa resolvé e situashon. Banda di por skohe pa yega na un areglo di pago, UTS ta ofresé tur su klientenan ku ta den e situashon aki e posibilidat pa sera un akuerdo di 1 aña pagando ANG 199,- pa luna i risibiendo kapasidat ilimitá. Klientenan ku ya a paga un montante riba nan kuenta di sobre-uso òf kendenan a paga nan kuenta kompletu, por risibí mesun pakete pa 1 aña, pero no mester paga e montante ku ya nan a paga kaba.
Klientenan ku nan kuenta di sobre-uso ta riba e ANG 2.344,- ta keda dispensá di e montante den ekseso.