Willemstad 19 mei 2014 – Djasabra último, 17 di mei 2014, mundu a selebrá Dia Internashonal di Telekomunikashon i UTS, bo kompania nashonal di telekomunikashon, ta sumamente orguyoso di por brinda Kòrsou (i Chippieland) kompleto, e mihó konekshon den telekomunikashon. Ta danki na e konfiansa ku pueblo a pone den UTS, ku awe UTS tambe por selebrá e dia spesial aki. Komo ku e aña aki Dia Internashonal di Telekomunikashon a kai riba un djasabra, UTS a opta pa selebrá esaki riba djabièrnè 16 di mei den un forma úniko. UTS a duna espasio na empleadonan ku tabata deseá esaki, pa partisipá na un proyekto masha bunita i noble pa duna bèk na komunidat riba un base boluntario. Den e proyekto aki, empleadonan di UTS a bishitá Betèsda, Hamiëd na Brievengat i tambe Hamiëd na Jan Noorduynweg, pa simplemente duna e habitantenan atenshon, amor i kariño. Na e tres instansianan aki, empleadonan a sosialisá den un forma interaktivo ku e habitantenan dor di entre otro sinta kòmbersá ku nan, hunga Bingo i kanta. Aparte di tur esaki, UTS a parti dushi ‘cupcakes’ pa tur e habitantenan i tambe e personal di e instansianan aki, p’asina nan tambe a selebrá e dia spesial aki ku UTS. Partisipando na e bunita proyekto aki, empleadonan di UTS kier a selebrá Dia Internashonal di Telekomunikashon. Duna bèk na komunidat no semper mester ta den forma efektivo òf material. Dunando simplemente atenshon, amor i kariño na habitantenan di sierto instansia ku hopi bes ta wòrdu lubidá, ta hasi hopi kurason kontentu. Tambe empleadonan di UTS a demostrá ku no ta semper mester haña algu bèk ora ku hasi un bon obra a base boluntario. Pues no ta e rekompensa ta importante, sino ta e atenshon, kariño i amor ta konta, huntu ku e satisfakshon di a hasi algu bon pa bo próhimo. Finalmente UTS ta bolbe gradesí tur su klientenan pa e sosten risibí atraves di añanan. UTS ta i mester keda é kompania ku ta garantisá pueblo servisio i produktonan di telekomunikashon konfiabel i pagabel.