United Telecommunication Services (UTS) i Maduro & Curiel’s Bank (MCB), bo Banko Amigu, ku hopi orguyo i satisfakshon, a sera un akuerdo mutuo, kaminda UTS ta é provedor prinsipal di servisionan di telekomunikashon pa tur su 61 Bankomatiko/ATM-nan situá rònt Kòrsou i tambe tur su 11 brènchnan.

Servisio di telekomunikashon pagabel, di kalidat ‘state of the art’ i ku bo por konta 100% kuné, ta esenshal i indespensabel pa un banko inovativo asin’aki. Netamente p’e motibu aki, MCB a skohe pa servisionan di UTS. Pa MCB ta sumamente importante, pa su klientenan ku ta hasi uso di su Bankomatiko/ATM-nan, por konta riba un servisio optimal i 24/7 durante henter aña. E servisio optimal aki ta konta meskos tambe p’e klientenan di MCB ku ta bishitá tur su 11 brènchnan aki na Kòrsou. Di otro banda tambe, pa UTS ta hopi importante p’e desaroyo di un komunidat ku ta progresá, keda konektá 24/7 ku akseso di kalidat na tur e funshonalidatnan ku ta disponibel atraves di retnan di telekomunikashon.

Ku e akuerdo aki, nos por ta orguyoso di e invershon aki di MCB, pa sostené un kompania lokal, esta UTS. Esaki ta nifiká ku e sèn ta keda na Kòrsou i ta stimulá i kontribuí na nos ekonómia i duna otro empuhe positivo na desaroyo di Kòrsou.