Pa motibunan personal, Usher a kanselá su konsierto pa Curaçao North Sea Jazz. Danki Dios nos por anunsiá ku e legendario Prince, lo subi stage Sam Cook djasabra anochi. His Purple Highness a nanse na 1958 komo Prince Rogers Nelson, yu di un pianista/kompositor i su mama kantantedi jazz. Na edat di 7 aña e mes a siña toka piano i a komponé su promé piesa. For di kuminsamentu di añanan 80, ku su eksitonan a kuminsá, Prince a bira un piesa klave den historia musikal: e tin un lista impreshonante di eksito riba su nòmber – tantu komposishonnan propio, komo komposishonnan di otro hende. El a bende mas di shen mion disko rònt mundu. Fuera di esei el a risibí shete (7) Grammy, un Golden Globe i un Academy Award.

RESTITUSHON

Si pa motibu di e kanselashon di e konsierto di Usher bo disidí ku bo no ta bai e konsierto di djasabra, nos ta duna bo e posibilidat pa entrega bo karchi di entrada i risibí bo sèn kompletu ($ 195,- òf Nafl. 354,90) bèk. Pa esaki nos ta pidibo pa bo bai Box Office na WTC riba e sigueinte dianan i ora:

–  Djarason 28 ougùstùs di 10.00 di mainta pa 6.00 di atardi

–  Djaweps 29 ougùstùs di 10.00 di mainta pa 6.00 di atardi

–  Djabièrnè 30 ougùstùs di 10.00 di mainta pa 12.00 mèrdia

Pa esnan internashonal ku a kumpra nan karchi via Ticket Master, nos lo tuma kontakto ku nan personalmente via mail kon nos ta restituí nan, nan sèn.