Willemstad – Curaçao Ponton Festival ta presentá un ‘line-up’ fuerte di artistanan lokal i internashonal den e género urbano riba djabièrne 6 di aprel. Durante e ‘Urban Friday’ amantenan por disfrutá di entre otro Jeon, Rich Kalash, Ronnie Flex, Hef i Grupo Extra.

Djabièrne anochi di e Curaçao Ponton Festival lo ta un anochi den e género urbano i hip hop. E ‘line-up’ di ‘Urban Friday’ ta konsistí di presentashonnan musikal di Jeon, Rich Kalash, Ronnie Flex, Hef, Grupo Extra, Jaido i Junior Tecla su VibeNation. Despues di un tempu largu, e artista rubiano Jeon lo duna un presentashon musikal na Kòrsou. Jeon a traha tempu pa ta presente na e Curaçao Ponton Festival. Resientemente Jeon, J Balvin en Anitta a risibí un premio platinum di Universal Music Latino pa nan kantika “Machika”. E kansion tambe ta number uno aworaki riba e lista di Latin Billboard.

Rich Kalash no ta deskonosí den e mundo di hip hop i e tin diferente hits manera  “Sin Stress”, “Brothers”, “Konsentra” i“Hala Fo’i Mi Way”. Su kolaborashon ku Izaline Calister pa e kantika “Kòrsou” tambe ta hopi gustá. Rich a traha diferente kantika ku rapper Jaido. Luna pasá Rich a lansa e kantika nobo “Kas Den Mondi”, kaminda Monifa Jansen ta figurá komo su frei den e ‘videoclip’ dje kantika.

E artistanan di Hulanda, Hef i Ronnie Flex, tambe tin hopi fans na Kòrsou. Hef ta konosí di e kantikanan “Hoop”, “Bijna”, “Droom” i “Kofferbak”. Den febrüari Ronnie Flex a wòrdu koroná pa e mihó artista den e kategoria di Hiphop na e premio Edison. E premio di Edison ta komparabel ku e premio di Grammy Awards. Ronny Flex tambe a risibí un premio pa e mihó disko di 2017. Por último, amantenan di latin i reggae por disfrutá di presentashonnan musikal di Grupo Extra i VibeNation. E banda urbano latino Grupo Extra lo presentá entre otro nan hits “Me Emborrachare”, “Hoy Se Bebe” i “Te Vas”.