Siman pasa Curaçao Medical Center (CMC) a risibí 30 ‘faceshields’ di Universidat di Kòrsou Dr. Moises da Costa Gomez (UoC). E ‘faceshieldnan’ a wòrdu trahá den e 3D-Lab di UoC i lo keda usá pa back-up den kaso ku lo mester mas material pa protekshon pa por trata pashèntnan di COVID-19.

E ‘faceshieldnan” a wòrdu di tèst dor di personal di CMC i aprobá dor di e tim di Prevenshon di Infekshon. Ku e ‘faceshieldnan’ e kara kompleto di  e personal ta keda tapá i asina e ta un di e materialnan di protekshon ku lo por wòrdu usá pa aserká pashèntnan di COVID-19.

E ‘faceshieldnan’ a keda produsí den e 3D-Lab di Fakultat Tékniko (FdTW) di UoC dor di studiante Glenson Bernabela huntu ku dosente partaim K. Schonewille, pa su konosementu riba tereno di ‘3D-printing’. Bernabela a instalá e 3D-Lab di e fakultat  ‘from scratch’ bou di guia di e staf sientífiko. Te ku awor e ta embolbí di aserka ku e 3D-Lab, ku ta ekipá ku diferente sorto di 3D-printer ku ta wòrdu usá tantu pa ophetivonan di estudio komo pa ophetivonan di investigashon i inovashon.

E studiante Glenson Bernabela a traha di dia i anochi pa por a print e “faceshieldnan’’.

E 30 ’faceshieldnan’ ta un donashon di UoC na CMC. UoC ta sinti su mes honrá di por a aportá di e manera akí na komunidat di Kòrsou den e temporada difísil akí.