WILLEMSTAD – Pa promé biaha durante Curaçao International Film Festival Rotterdam, ta organisá final di UNICEF su Festival di Sine di Derecho di Mucha. Ta pasa sine ku mucha na tur isla hulandes karibense mes a pensa i traha, durante e di shete edishon di Curaçao International Film Festival Rotterdam. 14 di aprel tin final di e festival di sine di mucha akí.
Último lunanan diferente skol na Boneiru, Sint Eustatius i Saba i na Aruba, Sint Maarten i Kòrsou a traha na UNICEF su Festival di Sine di Derecho di Mucha. Muchanan a traha sine tokante un derecho di mucha ku nan ta haña mas importante. E tim ku e mihó sine di e isla por bai e final.

UNICEF Hulanda ta kontentu ku e kolaborashon ku Curaçao Internationaal Film Festival Rotterdam, Melody Liefhebber, lider di proyekto di UNICEF Kinderrechten Filmfestival: ’Presentashon di e pelíkulanan ku e muchanan mes a traha durante Curacao International Film Festival Rotterdam lo kontribuí hopi na e muchanan su konfiansa propio. Nos ta kontentu tambe ku Curacao Internationaal Film Festival di e forma aki a invertí den e hubentut Caribense.’
Curaçao International Film Festival Rotterdam (CIFFR) tambe ta entusiasmá ku e koperashon: ‘Ku e sinenan di derecho di mucha, nos ke oumentá konsientisashon bou di mucha. Ora nan mira storia tristu, pero tambe plasentero, nan ta realisá nan mes ku e bida ku pa nan ta di mes, pa hopi mucha ta otro’, Percy Pinedo a bisa.

Ku e Festival di Sine di Derecho di Mucha di UNICEF, na un manera kreativo i interaktivo UNICEF Hulanda ke oumentá konosementu i konsientisashon relashoná ku derecho di mucha serka mucha, mayor i na skol. Di e manera ei, mucha huntu ku adulto por sali na interes di derecho di mucha. UNICEF su Festival di Sine di Derecho di Mucha ta bira posibel tambe ku yudansa di Representashon Hulandes na Kòrsou i ministerio di Interior i Relashon ku Reino. Banda di esei, UNICEF ta traha huntu ku partnernan lokal na tur isla hulandes karibense.