Primi play pa mira e mihó den Karibe ku kompetensia di sine ‘PlayGo Emerge’

Willemstad – Yüli 2021 PlayGo ta hasi un invitashon na tur produktor di pelíkula rònt Karibe pa partisipá na e PlayGo Emerge Film Competition. Laga nos selebrá e diversidat den kultura i e similaridat ku ta uni nos komo region. E kompetensia ta enkurashá kreadónan pa produsí un ‘short film’ ku e tema Celebrate the National Pride of your Country.

E kompetensia ku ta dura te ku 30 di sèptèmber, ta invitá produktornan den 3 kategoria; Hóbennan di edat di 12 pa 18 aña, Aspirante – te ku 5 aña di eksperensia, i Pro – mas ku 5 aña di eksperensia. Pa partisipá, e produkshon mester tin un durashon di entre 5 pa 15 minüt i  mester pertenesé na un di e siguiente géneronan: dokumentario, drama/fikshon, komedia, siensia fikshon, animashon òf reportahe fotográfiko. Partisipashon ta limitá na video òf fotonan original; nan lo pasa den un ‘screening’ i despues lo keda presentá di manera ku públiko por vota. Partisipantenan  mester download e app PlayGo i tin un suskripshon aktivo. Seguidamente por registrá pa e kompetensia dor di ‘upload’ e video/foto riba e plataforma playgoemerge.com

Pa duna sosten na e partisipantenan, i tur ku ta interesá pa siña mas di sinematografia, tin un masterclass series ku profeshonalnan di sine den Karibe manera entre otro, e Yu di Kòrsou Selwyn de Wind, tambe Gabrielle Blackwood i Joel Burke di Jamaica i diferente mas. Pa e serie aki, PlayGo a partner ku Third Horizon, un plataforma kreativo di produkshon i desaroyo sinematográfiko i otro formanan di arte den Karibe. E masterclass lo ta grátis optenibel riba e pagina di Facebook di PlayGo. Total, lo tin 20 premio: premio kèsh entre $500 i $2500, Adobe Premiere PRO-1, un biahe ku tur gastu pagá i diferente otro premio mas.