E siman aki ta un siman grandi pa scolnan basico

ORANJESTAD, Aruba –November 2015: Diabierna 20 di november Aruba lo conoce su prome “spelling bee” nacional, cual ta hiba e nomber Shoco sa Spel. E spelling bee aki sigur ta uno hopi unico mirando cu ta un competencia den 4 idioma; Papiamento, Hulandes, Ingles y Spaño. Minister di Enseñansa Michelle Hooyboer-Winklaar ta sumamente contento cu a acogida cu e proyecto ta hayando. E organisadornan cu a ricibi e proyecto cu brasanan habri for di ministerio di enseñansa, esta Fundacion Bon Nochi Drumi Dushi a bishita diferente scol pa mira con e trainingnan ta bayendo. Ademas di e spelling bee, a agrega un proyecto di arte pa e scolnan, unda cu e muchanan a wordo invita pa presenta inspiracionnan basa riba e tema “Creacion di Palabra”.

Di parti di Commandeur Pieter Boerschool diabierna lo bay presencia e participacion di Amanda, Jennyray, Mila y Valerie. Nan ta train hopi duro, cu un determinacion grandi pa sigui te ultimo den e competencia. Nan ta reuni cu un grupo y ta “overhoor” otro, pero tambe nan ta train hopi na cas. Mila Gomez ta comenta cu e ta gusta spelling y cu e preparacionnan ta bayendo bon. Su docente ta dun’e blachi cu palabra pa e traha riba nan na cas. Amanda Britten, kende lo participa den categoria Ingles, ta agrega cu un di e areanan cu e ta concentra riba dje ta e forma di spel durante di e competencia, esta cu e mester spel e palabranan na un manera “rustig en vlot”. Jennyray Calderon tambe ta preparando cu hopi training na cas y den grupo y lo participa den categoria Spaño. Valerie Hernandez ta añadi un otro forma di practica, esta cu e alumnonan ta lesa ful un storia y nan ta bis’e un palabra cu ta aparece den e storia pa e por spel e. E metodo di train aki tambe ta funcionando bon p’e y e ta expresa cu e ta sinti cu e ta cla pa e reto. E muchanan ta bon prepara pa un experiencia fabuloso. Esaki ta e prome spelling bee, pero ya organisadonan ta bisa cu nan ta prepara pa sigui pa hopi aña mas cu e proyecto bunita aki.