Willemstad –  Algu ku no sa okurí hopi na Aeropuerto Internashonal di Kòrsou ta biaheronan pegá na aeropuerto durante oranan di anochi, dor di wer òf mal tempu na un otro pais. Esaki tabata e kaso Djaluna anochi na Curaçao International Airport. Un biahero pegá ta e responsabilidat di un kompania di aviashon, sinembargo mal tempu hopi biaha ta ser konsiderá komo faktor eksterno ku ta stroba e servisio ofresé. No opstante esaki, e tim di Customer Service di CAP, sostené pa e funshonarionan di Operashon i di Seguridat, ku hopi dedikashon a traha oranan largu p’asina trese e biaheronan un tiki alivio den e sirkunstansianan ménos plasentero. Entre otro dor di ta presente kontinuamente, ofresiendo informashon, dunando sosten na e aeroliña, ofresiendo opshon di hotèl i dor di trese kuminda kayente, limonada i awa. CAP tambe a keda den kontakto ku e aeroliña, CTB i organisashonnan gubernamental i ta spera ku e situashon lo wòrdu resolvé pronto.