Dialuna mainta a tuma luga entrega oficial di e proyecto di embeyecimento di e area di Surfside. Un proyecto cu e contratista BIC a keda encarga cune y conhuntamente cu DOW a logra embeyece un area di beach y añadi un espacio di stacionamento cu un infrastructura completamente nobo. E parti infrastructural a keda financia pa FDA cu un costo entre 1.8 y 1.9 miyon Florin y ta bin acerca e facilidad cu a keda financia pa TPEF cu un costo di alrededor di 300 mil Florin. Intencion ta pa mehora e experiencia pa local y turista y Producto Aruba en general. Minister Oduber tabata sumamente contento pa mustra tur presente con e proyecto a keda.  “E facilidad aki na ta pa comunidad di Aruba na prome luga, y tambe e lo tin su balor den cuadro di nos bishitantenan specialmente pa esunnan di crucero. Nos a percura pa crea mas opcion di beachnan rond di nos isla pa asina alivia e presion cu tin actualmente den e area di hotelnan. Algun luna atras nos tabata na Arashi unda tambe a entrega un proyecto bunita cu tur su facilidadnan y aki na Surfside awor tambe tin su facilidadnan pa su usuarionan.”

E area sigur ta un proyecto di embeyecemento importante mirando cu directamente tur bishitante ta mira e area asina nan aterisa riba nos isla. Aeropuerto di su banda tambe a percura pa un embeyecemento cu un structura di heki nobo cu ta duna un toke pa un miho bista pa cada un avion cu ta baha den e area aki.

Un infrastructura cu nos por ta orguyoso di dje cu banda di e facilidad e tin su luz, mata pero tambe den e aspecto practico ta haci imposibel pa hende pasa riba e beach cu vehiculonan protegiendo asina nos beach cu actualmente ta conociendo un proceso di limpiesa tambe. Minister Oduber ta comenta: “Pa locual ta e subsuelo di nos beach, actualmente ta den un proceso pa saca e lodo, refresca esaki cu santo nobo. Un proyecto cu ta den pleno ehecucion y ta yegando den e area di cas di gobernador. E ta un proyecto cu no ta facil pa demostra pero e ta un inversion necesario y importante pa mantene e calidad di nos beachnan na un nivel halto, cu ta un di nos recursonan pa desaroyo economico di nos isla.”

Minister Oduber a finalisa bisando cu den nomber di Gobierno di Aruba, ta felicita Aruba cu un otro hoya mas!