Rich Kalash a presentá pa su fanátikonan djasabra último

WILLEMSTAD/ Djasabra último entre gritu i aplouso di su fanatikonan Rich Kalash a subi esenario na Club 1850. Un evento ku a keda hinká den otro den un dia, despues ku e festival di Ponton a keda kanselá nèt promé ku e urban night mester a tuma lugá. Rich Kalash un di e headlinernan di e urban night, no ke a desepshoná fanátikonan ku tabata pendiente pa su presentashon. E kas di e artista, Decoded, a sinta ku promotornan interesá na mesa i den un forma relámpago a organisá un ‘Last Minute’. Decoded ta gradisí tur ku a duna un man pa realisá e ‘Last Minute’, patrosinadònan ku a kere mesora den e potensial di e artista , tur medio di komunikashon i tur fanátiko ku a yega Club 1850 riba djasabra anochi.

Miéntras ainda mester resolvé e impase entre Decoded i SuMusica BV, e kas di produkshon di tantu Rich Kalash i Jaido komo esnan mas prominente den urban scene na Kòrsou ta keda positivo i ta keda kere den un trato hustu di parti di promotornan di SuMusica BV.

Rich Kalash a demostrá di ta un headliner di bèrdat, yenando Club 1850 ku un públiko grandi pa kanta su hitnan sam sam ku e propio artista- den apénas un dia di promoshon. Jaido, tambe a sòru pa un tremendo presentashon. E line-up Rich Kalash, Jaido i Quincy a sakudí Club 1850, den Skalo e wikènt aki. Pa loke ta Rich Kalash, manera fanatikonan sá, e tin ku raportá bèk na Hulanda awor ku su trabou na Kòrsou ta kompletá. Fanátikonan por mira sigui Rich Kalash i tur artista di Decoded riba e Youtube Channel @decodedofficial. Por stream riba ITunes, Spotify, Google Play i Apple Music tambe.