Digicel a duna un man na 75 famia di ménos rekurso ku un pakete di Pasku

WILLEMSTAD, Kòrsou- Desèmber- 2015: “Hopi bes nos ta selebrá Pasku sin ku nos ta ‘biba’ e nifikashon real. Pasku mester ta refleho di un berdadero selebrashon familiar. Henter esensia di Pasku ta wòrdu kreá rondó di ‘e famia’. Nos tur ta konsiente ku no ta tur hende tin e mesun forsa finansiero. E aña aki Digicel a aserká diferente fundashon pa yuda nos repartí paketenan di Pasku”, esaki di akuerdo ku Sr. Sten van der Ham, direktor di Digicel.

Digicel ta sera aña regalando 75 famia di ménos rekurso, ‘un pakete’ di Pasku. Di akuerdo ku Shayenne Rock, marketing manager di Digicel, “Meta prinsipal di e akshon tabata pa duna 75 famia oportunidat di selebrá Pasku, disfrutando di kuminda di Pasku. Hopi bes pa  falta di forsa finansiero nan no ta sinti e selebrashon manera nos. Bou di sirkunstansia normal un i tur mester por selebrá Pasku ku un plato di kuminda sukulento. Tabata masha bunita pa mira karanan kontentu i pa un ratu kita tur prekupashon for di mesa i remplasá esaki ku felisidat”. Den e paketenan tabata tin p.e rollade di karni, sùlt, galiña, aros, berdura, kos dushi i tur loke un famia mester pa selebrá Pasku. Digicel a aserká diferente fundashon entre nan, Huize St. Jozef, Casa Cuna Villa Maria, Banko di konsumo, Reclassering, Fundashon Boso Kosecha, Unidat Di Bario, Amigunan di Kristu. “Mi ke gradisí e organisashonnan ku a duna un man na esnan ku mester i alabes ta felisitá nan pa e bon trabou ku nan ta hasi tur dia. Danki na nos klientenan, sin nan e akshonnan aki no ta posibel. Ta huntu nos ta hasié! Durante di henter aña Digicel ta aportá na diferente proyekto, organisashonnan karitativo òf fundashonnan ku e meta di un desaroyo positivo pa nos komunidat”, asina Sr. Sten van der Ham, direktor di Digicel a finalisá. For di awòki Digicel ta deseá henter komunidat i spesialmente tur kliente un dushi temporada di fin di aña.