WILLEMSTAD I ORANJESTAD – E ora a yega pa Jeon, e talentoso kantante i produktor di Aruba, estrena su di dos single titula ‘AYO’ di su álbum nobo titula Biggy Boy Forever. E álbum aki ta un homenahe na tur fanátiko romántiko i lo keda estrena día 14 di februari 2020. Ku e álbum Biggy Boy Forever, Jeon ta reintrodusi su alter-ego romántiko Biggy Boy, i ta regresa na su origen musikal ku a hasi’e asina popular riba nos islanan e ultimo 12 aña.
Jonathan Thiel ta wak bek riba su karera musikal komo Jeon i su alter-ego Biggy Boy, ku un humilde satisfakshon i semper ta hasi su esfuerso pa dedika tempu na nos islanan kaminda su promé inspirashon a nase. Ounke su enfoke aktualmente ta riba su karera internashonal, e tin un luga spesial pa su fanatikada lokal. ‘AYO’ ta Jeon su ultimo produkshon, un kantika den e ritmo di Caribbean-Pop, ku ta papia di un despedida final di un amor ku no a kristalisa. E kantika a keda skirbi i produsi pa Jeon mes i e videoclip, ku tambe lo keda lansa awe, a keda dirigí pa Mario Gonzalves i Rui Jiang Ong, kende a fungí komo direktor. E biaha aki Jeon kier a hasi algu diferente ku e clip i a kolabora ku e kompania di produkshon RECENT.
Biggy Boy Forever
Jeon a dedika e álbum Biggy Boy Forever na tur su fanátiko romántiko ku semper a apoya i gosa di su músika. Na oktober ultimo, Jeon a lansa su promé single di e álbum titula ‘Pa Semper’, kual ta un kolaborashon ku Irsais. Riba Biggy Boy Forever lo tin mas kolaborashon ku varios artista popular di nos islanan ku ainda e tin komo sorpresa, i un proyekto sigur ku Jeon ta entusiasma p’e, ta su kolaborashon ku Clifton End.
Konsierto ‘Biggy Boy Forever’.
Aruba, Boneiru, Kòrsou i Hulanda ta den gran ekpektativa tambe pa lokual ku lo bai bira e konsierto Biggy Boy Forever ku lo tuma luga na mart 2020 na Aruba. Tambe Jeon lo tin algún presentashon pa e islanan di Korsou i Boneiru, i tambe Hulanda lo yega na turno. Aki, Jeon a priminti di trese un kombinashon di kansionnan bieu i nobo i lo hiba un i tur bek den e dushi temporada na kuminsamentu di su karera.
E videoclip di “AYO’ ta disponibel riba YouTube riba e pagina Arvanimuzic i e single ta disponibel na tur radio popular riba nos islanan. Bo por siguí JEON riba facebook.com/arvanimuzic i Instagram @jeon_arvani