Coridja Stars Productions ku tremendo inisiativa pa brinda diferente diseñadó e oportunidat pa kompetí pa e Mihó Trahe Nashonal, kual nos Miss Curaçao lo bai kompetí kuné den Miss Universo 2016. For di entrada, por a disfrutá di músika bibu na enkargo di e hóbennan di Karabelitos. Na e orario stipulá e grupo di baile D‘art a habri e anochi ku un bunita baile sigui pa promé presentashon di tur e kandidatanan den un trahe uniformá folklóriko kontemporanio kolo blanku.
Shas Hair tambe tabata presente pa un demostrashon di e último look di ‘Wigs”. Despues a toka turno na nos 7 beyesanan pa sali i lusi nan trahe nashonal. Nos mester bisa ku kada un tabata un, e diseñado nan a demostrá nan kreatividat i fantasia. Tur esnan presente a keda bou di impreshon di e lokual a keda presentá e anochi aki. Un pabien ta bai na kada un diseñadó ku a ku kontribui grandemente ku e kandidatanan i por bisa ku e aktividat tabata fenomenal.
Promé ku premiashon, MC a invitá señor Henny Reinilia di Reprod, Sra. Anatefca Isenia-Djaoen i Sra.Corrine Djaoen-Genaro riba esenario pa anunsiá i firma un kombenio di trabou entre e dos organisashonnan aki. Primisia pa tur esnan presente, nos promé finalista Miss Curaçao, lo bai representá Kòrsou den Miss World 20 di desèmber 2016 na Washington DC. Algu ku sigur a kai na agrado di tur esnan presente.
Pa loke ta trata e premiashon:
E premio máksimo a bai pa kandidata # 4 Kim Martina, importante pa menshoná, ku ta e mes a diseñá e trahe i e konfekshon tabata den man di Ludgene Balentien. Tuma nota ku esaki ta e trahe Nashonal ku nos Miss Curaçao lo bai partisipá kuné na Miss Universo, 30 di yanüari 2017. Promé finalista a resultá kandidata # 5 Nashaira Balentien ku su diseñadó Andrew Curiel. E trahe aki nos promé finalista lo bai partisipá kuné na Miss World.
I nos segundo finalista, kandidata # 3 Sabrina Namias de Crasto ku su diseñadó Diana Rolando. Trahe ku nos segundo finalista lo bai partisipá kuné na Reina Hispanoamerica. 
Tur e diseñadónan ku a kai den premiashon a risibí un plakat, komo muestra di apresio pa nan esfuerso. Tambe e kandidata ku a kai den premiashon a risibí un rekuerdo, lent i un bukèt di flor opsekio di Flowershop Obelysque.