Maduro & Curiel’s Bank i CIBC FirstCaribbean ta sigui ekstendé nan konfiansa den nos ekonomia i den Kòrsou.

Nos tur ta kòrda un aña pasá yegada di dos dòk flotante den nos Bahía di Santa Ana. E finansiamentu ofisial tambe a keda kristalisá.

E biaha aki ta trata di finansiamentu na Damen Dock Curaçao i Damen Shiprepair Curaçao pa un suma total di 32 mion dòler (ekivalente na kasi 59 mion florin).

Esaki ta enserá finansiamentu pa dos dòk flotante komo tambe kapital pa finansiá operashon di e kompania.

Segun gerensia di Maduro & Curiel’s Bank i di CIBC FirstCaribbean, esaki no solamente ta un paso grandi i positivo pa Kòrsou, pero tambe ta trese mas desaroyo ekonómiko, mas divisas i mas trabou pa Kòrsou.

Esaki ta otro manera pa nos stimulá negoshi internashonal ku nos país sigur por benefisiá di dje.

Tantu Maduro & Curiel’s Bank komo CIBC FirstCaribbean, Damen Dock Curaçao i Damen Shiprepair Curaçao ku ta forma parti di nos sektor privá, ta konvensí ku si nos invertí den nos ekonomia lokal, spesialmente den tempu ménos bon, esaki ta trese desaroyonan positivo pa nos Dushi Kòrsou. Desaroyonan ku nos por disfrutá di dje awor, pero ku nos yunan tambe por disfrutá di dje den futuro.

Huntu nos ta logra!