WILLEMSTAD – Ku profundo doló na kurason, nos mester a tuma nota siman pasá kon e palunan riba Brùg Emma a para deteriorá I básikamente na e momentunan aki ta un peliger eminente pa peatonnan ku diariamente ta hasi uso di e brùg aki pa krusa sea di Otrabanda pa Punda o Punda pa Otrabanda. Un peaton mester ta èkstra atento pa e no mester bira su pia riba e brùg aki, sigur mirando e kondishon ku e palunan aki a para bira, despues ku algun aña pasa ku masha hopi tam tam i hupla,  a inougurá e brùg kompletamente renobá di palu fuerte. Nos ta korda kon den pasado, e sirbidó aki a yega di Sali na defensa di Brùg Emma, The Old Swining Lady, despues ku a tene un resepshon riba e último aki i a lag’é pa dianan largu sushi tur na zeta, sous di pinda, kètsup, palu di saté usá  i sobra kosnan di komementu. E pa kiko ku nos a kuestioná esaki, tabata nèt despues ku e brùg a keda entrega komo un konstrukshon renobá ku nos kada unu ta sumamente orguyoso di dje, pero sigur no despues di e kos di barika yen ku a tuma lugá un anochi anterior ku tabata un resepshon di kita sombré riba nos brùg. Parse ku aki na Kòrsou nos no ta para ketu riba e importansia di Brùg Emma. No solamente e ta sirbi pa komuniká dos parti di nos pais ku otro, pero e ta un dje atrakshonnan turístiko di mas grandi ku Kòrsou tin. Pa kolmo na e momentunan aki e ta kompetiendo pa bira un di e ocho maravianan di e mundu aki. Si nos no realisá esaki i neglishá entre otro Brùg Emma, nos ta kompletamente leu for di kas, pasombra esei ta nifiká ku nos no tin balor di nada. E simpel kos ku mester a sosodé tabata mantené, kuida e palunan, koregí  na tempu etc etc. Lamentablemente esei aparentemente nunka no a sosodé i awe nos tur ta lamentá ku e palunan ta kibrando i por kousa daño na ènkel i rudia di hende. Palabra ta na Gobièrnu di Kòrsou i si nos no ta herá na Curaçao Ports Authoritry ku ta esun ku na nòmber di e pueblo aki ta kuida nos brùgnan den suidat. Lo mester hasi un análisis profundo di e situashon di palunan riba brùg, kuminsá ku un proseso mas rápido posibel pa drecha loke por drecha i asina ei skapa Brùg Emma i The Old Swinging Lady di moda ku nos pueblo i turistanan por sigui hasi uso di e brùg aki sin ta kore e rísiko di por bira nan pia. Ta un bèrgwensa di marka mayo ku nunka por a mantené Brug Emma ku nos tur ta asina orguyoso di dje. The Old Swinging Lady ta nos trade mark i mester kuid’é