Un proyekto di Tera Percussions
| WILLEMSTAD – Ganadó apsoluto na aña 2013 di JCI CYEA Tera Percussions ta rumbo pa Kas Blanku ku un plan ekstraordinario pa hasi entrega personal di un opsekio úniko na famia di Presidente di estadounidense, famia Obama.
Loke a kuminsa komo un plan di inovashon di un produkto diripiente a kombertí den un reto ambisioso i fuera di normalidat. Un luna pasa Tatiana Saturnino-Felix (doño di Tera Percussions) a puntra su amigunan riba Facebook ta kua tipo di diseño nan lo ta deseá di laga pinta riba un barí propio. Alabes a indiká pa e ideanan ta algu otro for di diseño kultural komo ku a yega di hasi esaki kaba. Despues di un kantidat di reakshon i rekomendashon esun ku mas a hala su atenshon tabata e idea pa pone kara di Presidente Barack Obama riba un barí – un idea ku a bini di Haily de Palm. E idea a sigui haña forma segun tabata risibí diferente tep balioso inkluyendo Tatiana su propio toke personal i esfuerso. Huntu ku e potrètamentu di Presidente Obama tambe Tatiana tabata deseá na pone kara di Primera Dama huntu ku nan dos yu muhe. |
| A hasi un apelashon speshal riba diferente medio sosial pa kompartí e potrètnan riba e página di Facebook Tera Percussions pa asina demostrá sosten i union ora ta trata di nos paraiso stimá. Tur esfuerso ku a keda ehersé por a wordu eliminá si a djis tuma kontakto dirèkt ku e persona konserní ku fasilmente por a hasi entrega di e barí aya na Kas Blanku. Pero no tin duda ku e satisfakshon na final lo ta mas grandi ahinda si nos sa ku ta komunidat kompletu tabata involví i a traha huntu komo un pais. E proyekto aki por ta mustra ireal. Sinembargo nos tin di rekordá nos mes ku soño por bira realidat sin importa kon grandi nan ta basta tin perserveransha.
Patras di tur gran idea tin un historia eksepshonal. I patras di kada historia eksepshonal tin un persona trabahoso, ku hopi determinashon, positivo, i ku un vishon firme para huntu ku un ekselente tim ku ta apoy’é. Tatiana Saturnino-Felix huntu ku su mènèdjer empresarial, Lee Singh, ta moviendo shelu i tera pa krea un kambio positivo pa nos dushi tera. Ku suerte na nos banda e dia lo yega kaminda nos no tin di splika niun turista ku nos ta keda banda di nos hermana isla Aruba pa indiká unda nos ta situá. Pero na momentu ku nos menshona Kòrsou nan sa tur kos kaba. Outor: Vanja Wanga
|
| Pa loke ta trata e imágen patras a hasi un kombinashon di e bandera estadounidense ku esun di nos pa asina duna elogio na nos dushi isla Kòrsou. Kla pa kuminsa ku un trayektoria nobo Tatiana huntu ku artista kolaboradó, Ariadna Nicasia a kuminsa mesora ku produkshon di e barí aki ku ta hopi speshal.
A tuma Tatiana solamente un siman pa a krea e barí pa asina por a duna esaki na Ariadna ku na su turno a kontinuá ku e parti di diseño. Durante un luna Ariadna a sa di hasi un tremendo trabou ku su toke mágiko. I por último Tatiana a traha durante un siman mas pa kaba di refiná e arte magistral aki. Despues di sèis siman di dedikashon i un bon trabou ehersé komo un tim porfin e barí ta kla pa wordu entregá na famia Obama. Loke ta hasi e inisiativa aki mas ekstraordinario ta e ophetivonan definí pa e inisiadónan ku ta pa simplemente uní tur persona biba aki na Kòrsou pa sostené i traha huntu pa logra un meta en komun. I tambe pa duna Kòrsou kobertura riba nivel mundial aserkando un famia prominente ku ta biba na un di e pais nan di mas poderoso di mundu, ku ta estadounidense. Pa por kristalisá e proyekto aki tin mester di koperashon di tur dushi Yu Di Kòrsou. |