Willemstad – Dia 28 di febrüari último Rotary Club Willemstad a inisiá  su akshon anual úniko “ Dare to Wear a Beard”. Di e fondonan rekoudá, e aña akí un parti ta bai pa Fundashon Pro-Bista Kòrsou ku ta bringa pa integrashon i independensha di hendenan ku un hèndikèp visual na Kòrsou. Meta di Fundashon Pro-Bista ta pa hasi personanan ku un hèndikèp visual na Kòrsou mas independiente posibel, di manera ku meskos ku tur otro hende nan por partisipá kompletamente den komunidat. Esaki no ta nifiká solamente ku nan por hunga dushi pafó, bai skol normal , traha i biba independiente, sino tambe ku nan por investigá i desaroyá nan interes- i hòbinan. Pa guia hendenan ku un hèndikèp visual den esaki mester di sierto asesorionan spesial. Pa muchanan ku ta bai skol por ehèmpel, mester di sierto material spesial pa por duna nan mesun edukashon ku otro muchanan. Ta esensial pa nan por siña lesa i skibi braille. Pa esaki mashinnan di braille ta indispensabel. Ta usa e mashinnan di braille tantu na skol komo na e sentro di Pro-Bista. Tambe e  departamentu di hubentut mester di kòmpiuter pa adaptá i digitalisá buki di skol, pa prent material di lès den forma di braille i pa trabounan atministrativo i training di gerensia. Pro-Bista a aserká Rotary Willemstad pa un suma di 13.000 florin, ku lo mester finansiá 5 mashin di braille i 2 kòmpiuter.  Rotary Club Willemstad a reakshoná entusiasmá riba e petishon i a pone man na obra. Durante e akshon di barba, no ménos ku 20 kabayero di Rotary a laga na barba para. Ku esaki – i ku yudansa di spònser prinsipal Gillette-  nan a rekoudá mas ku 30.000 florin, di kua Fundashon Pro-Bista Korsou a  haña 13.000 florin. Dia 3 di dezèmber Rotary Club Willemstad a haña un demonstrashon di e mashin i kòmpiuternan nobo di Pro Bista. Potrèt 1: Yuraima Bodak, Koordinadó departamentu pa hóbennan di Fundashon Pro Bista, ta risibí e plaka simbóliko den braille i ta rondoná pa  Focco W. Lunsingh Scheurleer, Raoul Hooftman i Franco Diaz di Rotary Club Willemstad.