ORANJESTAD, Aruba – November 2015: Diasabra atardi a ricibi beisbolistanan y umpirenan veterano di Aruba, cioachnan y trainers pa un encuentro pa un “sneak peek” di Joe Laveist Sport Park. E team organisando e eventonan pa reapertura di e facilidadnan durante di e pre-evento aki a invita tur e veteranonan pa participa na e apertura cu ta tuma luga riba dianan 27, 28 y 29 di november. Nan lo wordo honra durante e ceremonia di apertura. Tabata un ocacion hopi ameno, unda cu e veteranonan a comparti algun di nan experiencia y storianan di e tempo cu e facilidadnan tabata conoci como Lago Sport Park. Un grupo grandi di nan a cuminsa hunga beisbol den cuminsamento di añanan 1950 y tabata sumamente contento di por topa cu nan amigonan bieu riba veld y combersa un poco. E veteranonan a keda contento cu loke nan a wak y a comparti algun idea pa futuro actividadnan cu por wordo organisa na e park. Minister Mike de Meza tambe tabata presente pa cuminda e hungadonan y umpirenan, kende a expresa nan complimentnan cu entusiasmo pa cu e vision cu e mandatario tin pa e facilidadnan.

E team di apertura pronto lo presenta algun di e storianan y entrevistanan haci durante di e evento VIP riba nan pagina di Facebook. No a haci falta e presencia di representantenan di algun di e federacionnan cu lo participa na e festividadnan di apertura, cual ta inclui no solamente e federacion di beisbol, pero tambe futbol, volley, tennis, atletiek, y mas. Tabata hopi bunita pa wak e intercambio entre e federacionnan y e veteranonan y tur ta comenta cu nan ta hopi entusiasma pa cu e reapertura. E reapertura grandioso di Joe Laveist Sport Park ta posibel pa medio di e contribucionnan di sponsornan valioso, incluyendo Lotto, Aruba Bank, Valero Aruba, Sport Caribe y Stellaris Casino na Marriott Resort. E organisadornan ta gradici tur e sponsornan y tur esunnan cu a contribui cu nan ideanan. Na tur esunnan cu lo kier aporta na e evento aki por tuma contacto cu joelaveistballpark@gmail.com. E evento titula “Take me back to the ballgame” ta tuma luga riba dianan 27, 28 y 29 di november y ta inclui un show di apertura spectacular, demostracionnan di diferente deporte, weganan di beisbol emocionante y un extraordinario “All Star Game” di softball entre astronan di Major League Baseball y e seleccion di Aruba.  Pa mas informacion y pa sigui tur e ultimo desaroyonan pa cu e reapertura di Joe Laveist Sport Park, bishita nan pagina di Facebook of tuma contacto cu e team organisador via di email joelaveistsportpark@gmail.com.