Willemstad- E Festival di Teater Boeli & Tip ta den full swing na Teatro Luna Blou. E obranan “De Morgen loeit weer aan” i “ Schilden van Leem” a sa di yena salanan yen. Djaweps 18 di sèptèmber e festival lo wordu dedika na Tip Marugg. Akinan e trabou di e legendario eskritor Yu di Kòrsou lo wòrdu trese den forma di literatura, kanto i pelíkula. Tip Marugg a skibi tres buki masha prominente, di kual su último buki “De Morgen Loeit weer aan” (De Bezig Bij, 1988) ta esun mas popular. Despues di a traha vários aña na Shell komo redaktor di Passaat -e korant pa personal di Shell – Marugg a bai biba un bida solitario na Banda’Bou. E konosedó di Papiamentu, dosente i aktor Jeroen Heuvel lo duna un lektura tokante di Tip Marugg. Den su lektura lo e toka temanan importante di e trabou i bida di e outor. Despues lo tin presentashon di e dokumental “Niemand Goedenacht”, kual ta forma parti di e trilogia “De Indiaan baarde een Neger” di direktor Sherman de Jesus di 1992. E anochi lo wòrdu klousurá den un forma masha speshal dor di Margareth Craneveldt, konosí di e banda Happy Peanuts. Margareth lo kanta poesianan di Marugg, bou di guia di Stanley Betrian riba kitara i Giovanni Maduro riba piano. Tambe lo tin un pareha ku lo deleitá e públiko ku un bunita tango, kual lo ser bailá riba e poesianan di Tip. Un i tur ku konosé i ta apresiá e trabounan di Tip Marugg no mag di pèrdè e anochi aki. Pa esnan ku no tin hopi konosementu di e literatura di Kòrsou, e presentashon aki ta duna un bista importante di un di e eskritornan mas konosí den nos literatura. Karchi ta kosta ANG 35,- i ta optenibel na Mensings, Bruna, Albert Heijn i Teatro Luna Blou.