Durante 2014 tabatin 23 morto i  2211 herido den tráfiko na Kòrsou. Esaki ta, sigun eksperto di tráfiko Eric de Bree, muchu hopi. Durante e di 3 seminario di Prevent Now! dia 16 di òktober próksimo den WTC na Kòrsou, e ta splika ku hopi ehèmpel den práktika kon aksidentenan den tráfiko hopi bia ta un akumulashon di desishonnnan  robes i inkonsiente, i kon por stimulá shofùrrnan  pa kore mas sigur i defensivo.

Mas ku 12.000,00 aksidente den tráfiko na Kòrsou.

Niun hende no ta sali kas mainta ku e idea di bai okashoná un aksidente. Tòg den 2014 tabatin mas ku 12.000 aksidente den tráfiko. “Tur hende ta kere ku nan ta bon shofùr, i tòg no t’asina”, De Bree ta konta. El a kore hopi aña komo shofùr di trùk di karga i konvoi den Europa, i awor akí entre otro ta traha komo instruktor  pa ANWB Drivers Academy. “Kore sigur ta un eskoho konsiente. Enkambio hopi aksidente ta resultado di un akumulashon di hopi desishon chikitu i robes, ku pakolmo un hende ta hasi inkonsientemente. Keda sin bisti faha di seguridat, kore yega un krusada ku velosidat haltu, kore pega riba e outo bo dilanti riba un kaminda drùk i peligroso, tur ta eskoho. Falta di konosementu di reglanan di tráfiko, mal mantenshon di bo outo, tambe ta eskoho. Keda 1 sekònde sin wak den spil, keda sin sende régtenwèizer, òf atendé ku bo selular, i bo ta kore dal un motosiklista mata. Hopi akto chikitu i ku ta mustra simpel, òf falta di hasi esakinan, ta kondusí na aksidentenan grandi den tráfiko.

Semper e mesun shofurnan den problema

Mayoria aksidente den tráfiko ta sosodé pasó e konduktor ta pèrdè kòntròl riba su stür. De Bree ta intrigá dikon esei ta asina. De Bree: “Ora tin aksidente mayoría bia esun ku a okashoná e aksidente ta akusá e otro partido. Pero statistik ta mustra ku semper ta e mésun shofùrnan ta kousa problema i ta provoká komportashon agresivo riba kaminda. Hopi bia nan no ta ni konsiente di esei.  Ami ta guia mi shofùrnan paso pa paso. Kore den tráfiko ta un wega  dushi, pero nunka e mester ta  un kompetensha. Komo instruktor mi ta mustra kuantu influensha positivo bo por tin riba otronan den tráfiko i mi ta mustra e shofùrnan riba e eskohonan chikitu  pero konsiente ku bo por hasi pa prevení aksidente riba  kaminda. Esaki hopi bia ta habri nan wowo.” Na Europa kada 5 aña shofùrnan di trùk di karga i di konvoi tin ku sigui un kurso obligatorio pa lei pa nan por keda partisipá den tráfiko. Bon mirá pa outomobilistanan privá tambe esaki lo ta algu hopi deseabel”, sigun de Bree.

Rònchi riba Kòrsou

De Bree ta un hòmber di práktika. “Ora mi yega Kòrsou, mésora mi ta hür un outo i ku 4 kámara chikitu pegá na e outo mi ta kore wak bon rònt di mi. Mi ta ansioso pa kore un rònchi provokativo na Kòrsou. Te ora mi ta komprondé  e “idioma di kaya” mi ta duna konseho. Den esaki mi ta paga bon tinu na e liñanan pintá riba kaminda, e iluminashon, i forma di e kaminda. Krusada – i rotòndenan ta trahá di un manera bon visibel? Palunan di lus i bòrchinan di tráfiko ta poné na sitionan inteligente i sigur? Lusnan di tráfiko ta sòru pa e tráfiko ta kore di un manera lógiko?”

Sigun de Bree gobièrnu por kontribuí aktivamente na un tráfiko mas sigur, i pa kompanianan di seguro tambe tin un ròl importante den esaki. Pa  Kòrsou de Bree tin un konseho bon kla: “Komo komunidat invertí konsientemente den komportashon defensivo den tráfiko i analisá aksidentenan di tráfiko  bon i konsistentemente. Perkurá pa komo partisipante den tráfiko, kompania di seguro i gobièrnu bo sigui siña di tur e aksidentenan ei, pasó kada víktima den tráfiko ta unu dimas.”