Ja caba Aruba ta den e gara di Island TakeOver Festival desde diaranson pero diabierna anochi lo tin e concierto ta spera.  Diahuebs atardi na Aruba Marriott Resort a tuma lugar un rueda di prensa unda cu prensa a topa cu integrantenan di UB40 esta Ali Cambell y Astro. E cantantenan ta contento di ta bek na Aruba despues di 25 anja. Nan a comparti cu e show cu nan lo presenta lo ta un ‘Greatest Hits’ show. Esta cu e publico lo sa di canta tur cancion nan. Nan banda completo tambe a yega Aruba y diahuebs tambe a hasi nan chekeo di sonido cual a zona hopi bon.

Mester comparti cu no tin hopi carchi mas disponibel mirando e diferente generacionan cu ta bayendo e evento. Diabierna durante dia e otro artistanan lo ta yegando manera, Sech, Lunay, Alex Sensation, Dimelo Flow y Chris Jeday. Jeon tambe Tabata presente na e rueda di prensa y comparti cu e mes y su team a traha duro pa un show completamente nobo cual Aruba lo sa di e disfruta di dje.

Algun minuut promer cu e rueda di prensa algun fanatico fiel di UB40 ft Ali Campbell & Astro a logra topa y saca potret cu e cantantenan. Nan a gana esaki via diferente radio emisora. Tambe e banda firma dos guitara cu lo tin un proposito pa recauda fondo pa un bon causa. Aruba Tourism Authority den representacion di Sr. Patrick Melchiors a jama e banda Bon Bini na Aruba y ta spera cu nan lo disfruta di nos isla.

Carchi ta obtenibel na Citgo Blvd, Citgo Essoville, Citgo Palm Beach, Superfood, Fun Miles, Craft y online www.islandtakeover.com . Pa esnan cu ja tin nan carchi nan por pasa na e POP UP Store situa na The Village banda di Gusto Nightclub for di 10 or di mainta te cu 4 or di atardi pa cambia nan ticket pa un banchi. Despues cu e tienda sera, por hasi esaki anochi na e concierto tambe. Porta ta habri pa 7 or di anochi. Importante pa meniona cu L G Smith Boulevard lo ta parcialmente sera for di Citgo Boulevard te Turbo retonde. Pa esnan cu kier hasi uso di parkeo paden di Harbor Arena, mester pasa via e banda di ex Bushiri Hotel.