WILLEMSTAD– Maduro & Curiel’s Bank su ekipo di Bolas Criollas ta organisá pa di dos aña konsekutivo e Turneo di Bolas Criollas Komersial i Veterano “We Believe”. E turneo aki lo tin un durashon di 4 siman i tur wega lo tuma lugá den wikènt na kompleho deportivo di UTS na Regentesselaan (dilanti di Belastingkantoor). Weganan ta start djabièrnè 1 di Novèmber 8.00 p.m. i lo bai tin riba e fecha aki un total di 8 wega den 2 diferente kancha. Djasabra 2 di Novèmber pa 4.00 p.m. lo tin apertura ofisial i lo tin atenshon speshal pa e organisashon kual e Turneo di Bolas Criollas Komersial i Veterano “We Believe” 2013 ta dediká na dje : Fundashon Pro Bista Curaçao. Despues di e apertura ofisial lo sigui un total di 16 wega di Bolas Criollas repartí den 3 diferente kancha te 10.00 p.m. E meta di e Turneo di Bolas Criollas e aña aki ta primeramente pa yuda konsientisa komunidat di e eksistensia di Fundashon Pro Bista Curaçao. Meskos ku tabata e kaso aña pasa ku Special Olympics Curaçao, e aña aki MCB Bolas Criollas lo hasi un donashon na e organisashon Fundashon Pro Bista pa asina aki e organisashon aki tambe por sigui yuda pa asina e klientenan di Fundashon Pro Bista Curaçao sigui kere den nan mes. Aparte di esaki MCB Bolas Criollas ke sigui promové deporte general i den e kaso aki spesifikamente e deporte di Bolas Criollas i trata na sigui yuda pa tur deportista i e organisashonan deportivo tambe sigui kere den nan mes. Ekiponan ku ta partisipá den Turneo di Bolas Criollas Komersial i Veterano “We Believe” : Kategoria Komersial : Aqualectra, 3 ekipo di MCB, Post N.V., 2 ekipo di Kapriles Kliniek, 2 ekipo di Selikor, Spuitinrichting Scherpenhuevel, Special Olympics Curaçao, Curoil, UNA, Isla, Polis, Building Depot, Sunscape, CDM i Kusters Tarding. Kategoria Veterano : Tempo I i 2, Kos Bon So 1 I 2, Los Angeles, Toy & Co, Los Hermanos, Explotion, Luna ku Solo I Destroyer. MCB Bolas Criollas ta invitá tur fanatiko di Bolas Criollas i deporte en general pa bin presensiá bon weganan di Bolas Criollas. Naturalmente ta bai tin bon ambiente i un kushina i bar bon surtí. Djadumingu 3 di Novèmber tambe lo tin un total di 17 wega kuminsando for di 12or p.m. te 5.00 p.m.