Michelle Begin ta anfitrion di e di cinco Ms Canada Charity Beach Volleyball Tournament

ORANJESTAD, 11 di Maart 2016: For di prome biaha cu Michelle Begin a bishita Aruba for di Canada el a namora di e hendenan cariñoso, e beachnan, e ambiente, y mesora el a decidi cu e ta sigui bolbe Aruba aña tras aña. Aruba ta Michelle su “home away from home”, esaki ta unda cu e ta sintie feliz y cu hopi entusiasmo el a lansa “Ms Canada Charity Beach Volleyball Tournament”, pa recauda fondo pa obranan comunitario special. Balashi y Print Media a uni na su esfuersonan for di e prome torneo y ta keda su sostenedornan mas fiel, hunto cu hopi otro companianan cu a uni como sponsor pa haci di e evento e exito grandi cu e ta awe. Pa su di cinco evento anual, e torneo ta dedica na memoria di Jean Begin. El a comparti su pasion pa yuda hende y su amor pa Aruba. Michelle Begin a ricibi e titulo di Ms Canada 10 aña pasa ora cu el a wordo scogi como Ms Canada durante di un evento dibertido na Tropicana Hotel, y ora cu e tabata planeando su prome evento di caridad, el a dicidi di dun’e e nomber aki.

Den apenas cuater aña, Michelle Begin a recauda cerca di 40 mil dollar; e ta distribui esaki entre organisacionnan pa cumpli diferente di nan deseonan, incluyendo proyectonan mas grandi manera e compra y instalacion di varios airco pa Ambiente Feliz, un residencia pa adultonan cu deficiencianan intelectual, y pa proyectonan mas chikito, incluyendo e compra di bunita mata pa un señora di edad cu deficiencia intelectual kende ta encanta traha cu mata. Ms Canada semper ta na Aruba pa por lo menos dos luna cada aña, pasando tempo na su hotelnan di timeshare faborito, mientras cu e ta organisando e competencianan di beach volleyball cu ta tuma luga riba un dia. E di cinco Ms Canada Beach Volleyball Tournament a tuma luga riba diadomingo dia 28 di februari ultimo, cuminsando for di 10or di mainta na Eagle Beach dilant di La Cabana. Riba dia 24 di maart, un di dos evento ta tuma luga na Hard Rock Cafe pa 6or di atardi, unda cu lo tuma luga un rifa pa premionan spectacular.

E sponsornan cu a uni cu hopi entusiasmo cu sra. Begin pa haci e evento di e aña aki un exito, ta: Renaissance Resort, South Beach Center, Aruba Trading Company, Clearly Realty, Magic FM, La Cabana, Julio’s Watersports, Casa Tua, ASD, Smit & Dorlas, Hard Rock Cafe, Peanuts, Diamante, Print Media, Curtain Call, Tera Group, Indulgence by the Sea, Aruba Tourism Authority, Balashi, Chill y Queens. Michelle Begin ta gradici tur sponsor pa nan cooperacion generoso. Den transcurso di añanan, e fondonan a wordo distribui pa diferente obra di caridad. Na aña 2012, donacionnan na un total di 4.500 dollar a bay pa un miembro di Cuerpo Policial, Casa Cuna – di acuerdo cu nan lista di deseo; y Mi Por, un fundacion pa muchanan cu deficiencianan fisico.

E donacionnan na aña 2013, un total di 9.200 dollar, a wordo presenta na Ambiente Feliz (un dishwasher); Let’s Talk Foundation (1.000 dollar), Casa Cuna – di acuerdo cu nan lista di deseo; un miembro di Cuerpo Policial – pa asisti na un competencia grandi na Ottawa, Canada; un persona cu deficiencia intelectual cu ta gusta traha cu mata (mata pa Club Kibrahacha 60+), un club di tennis (materialnan pa construi un gazebo); tennis club (un deep fryer). Ms Canada tambe a haci donacionnan pa un beca pa lesnan di tennis y a cumpra un regalo pa Tropicanan Resort pa gradici nan pa nan hospitalidad. Na aña 2014, e fondonan recauda, un total di 9.000 dollar, a bay como donacion pa Ambiente Feliz (2.989.51 dollar pa cumpra airco), Club Kibrahacha 60+ (2.000 pa nan cafetaria); clubhuis di club di futbol Washington (1.000 dollar) y materialnan pa e unidad motorisa di Cuerpo Policial (800 dollar). Michelle Begin un biaha mas na 2014 a cumpra algun mata pa Club Kibrahacha 60+ pa regala un señora cu deficiencia intelectual cu ta biba na Ambiente Feliz y ta gusta traha cu mata.

Aña pasa e donacionnan a alcansa un total di 8.022 dollar. E fondonan a bay pa Ambiente Feliz pa cumpra y instala mas airco na e cas; matanan pa un cliente di Ambiente Feliz; un beca (2.000 dollar) y Mrs. Palmer and Ms Canada’s Soup Kitchen (1.000 florin). Ibero American High School a ricibi un projector nobo pa un di su klasnan, y Thuiszorg Aruba a ricibi un donacion di mata y potchinan di terracotta, como un contribucion na e ambiente na e cas.