AHATA ta conmemora “World Tourism Day 2016”  Brindando servicio na un scenario cu ta sigui evoluciona

ORANJESTAD, Aruba – 27 di september 2016: Aruba Hotel and Tourism Association (AHATA) ta conmemora Dia Mundial di Turismo cu un saludo cordial na tur persona, compania y institucion cu ta participa y contribui na e industria principal y pilar number un di e economia di Aruba, esta turismo. AHATA ta felicita y gradici tur actor trahando y contribuyendo na e industria dinamico, vibrante y versatil pa nan contribucion y trabao duro, nan esfuersonan y pasion pa haci di Aruba un storia di exito y ehempel bes tras bes. Aruba su exito ta di cada un di boso; bisa cu confiansa y orguyo: Ami ta Turismo!

Tur dia tin desaroyonan nobo den e industria aki cual ta permiti cu no solamente mas persona por participa na biahe y turismo, pero definitivamente tambe por mira un cambio den e perfil di e persona cu ta biaha. Esaki ta evidente na Aruba tambe, unda cu por a nota den transcurso di añanan cambionan significante – algun radical y algun cu a tuma tempo – den e servicionan cu ta wordo ofreci, como tambe na e infrastructura di edificionan.

World Tourism Organization (WTO) y partnernan den e industria di turismo mundialmente ta conmemora Dia Mundial di Turismo e aña aki cu e tema “Accessible Tourism” (Turismo Accesibel). Asina e institucion cu ta pertenece na Nacionnan Uni ta pone enfasis riba e importancia pa tur pais, organisacion y compania cu ta brinda servicio y un bonbini na bishitantenan cu tin como meta “turismo” pa nan tene cuenta cu tardi of tempran, tur ser humano lo aprecia e beneficionan di accesibilidad universal.

Na Aruba por nota cu den transcurso di añanan ta tumando luga adaptacionnan infrastructural significante na hotelnan cu ta ofrece estadia di e tipo “timeshare”, pero tambe na otro hotelnan, unda cu famianan di dos, tres y cuater generacion ta doño of huesped.

E cambionan den necesidadnan di e biahero tambe ta bisto na Aeropuerto Internacional Reina Beatrix, na diferente restaurant, mall, parkeerplaatsnan, bañonan, y luganan publico. Negoshinan a cuminsa ofrece mas productonan na huur, acomodando ademas di e mercado local, e mercado turistico. E impacto t’ey, sigur si mira hotelnan cu a bay di apenas 1 pa 2 cupo di parkeer pa personanan cu necesidadnan special, pa 10 of mas cupo, di cual tur ta yen tur ora.

E celebracion oficial di Dia Mundial di Turismo ta tuma luga diamars na Bangkok, Thailand. Pa 2016 a scoge e tema “Tourism for All – Promoting Universal Accessibility”, esta “Turismo pa Tur Persona – Promoviendo Accesibilidad Universal”. E evento y, momentonan di reflexion y celebracion rond mundo, ta dirigi na conscientisacion encuanto di e importancia di turismo y su impacto social, cultural, politico y economico. Logra accesibilidad universal pa turismo ta un responsabilidad comparti pa tur actor envolvi den e cadena di turismo; e ta tambe un oportunidad pa negoshi pa companianan y destinacionnan, segun WHO.

“Tur persona tin e derecho di acceso na servicionan di tempo liber y turismo riba un base igual. Sinembargo 1 biyon persona rond mundo kende ta biba cu un incapacidad, como tambe muchanan hoben, hendenan di edad y personanan cu otro necesidadnan di acceso, ainda ta confronta cu obstaculonan pa cu accesibilidad na e elementonan basico di biahe, manera informacion cu ta cla y confiabel, servicionan di transportacion y publico cu ta eficiente, y un medio ambiente fisico cu ta facil pa nabega. Hasta cu tecnologia nan moderno, esunnan cu limitacion visual, di oido, di mobilidad of cognitivo ta keda atras na hopi destinacion turistico,” Secretario General di Nacionnan Uni Ban Ki-Moon a laga sa den su mensahe oficial.

“Tur ciudadano di mundo tin derecho di experencia e diversidad increibel cu e planeta aki ta ofrece. P’esey, ta di vital importancia pa tur pais y destinacion, como tambe e industria, promove accesibilidad pa tur den un medio ambiente fisico, den sistemanan di transportacion, den facilidadnan y servicionan publico, y pa medio di canalnan di informacion y comunicacion,” Secretario General di UNWTO, Taleb Rifai a expresa.

Kobkanr Wattanavrangkul, Minister di Turismo y Deporte di Thailand, kende su pais tin retonan pa cu accesibilidad a comenta cu “nos mester compronde e teoria di diseño universal (…) Como cu e mundo di biahe y turismo ta un industria cu ta expandiendo y e cantidad di biahero ta crece tur aña, nos tin cu sigura cu biahe ta mas sigur y mas conecta posibel.”.

E conferencia entre otro a inclui diferente charla y sesion cu ta subraya e importancia di provee accesibilidad pa tur ser humano. Un parti importante di e evento a adresa strategianan innovativo den e desaroyo di un infrastructura, producto y servicionan accesibel cu ta agrega balor na destinacionnan, y ta duna realce na nan competividad riba e mercado global turistico. A discuti algun di e miho practicanan, “best practices” cu e meta pa enfatisa e balor di inversionnan den accesibilidad.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.