WILLEMSTAD- 14 di OKTOBER- 2013:- Di akuerdo ku karchinan di imigrashon ku CTB ta kompilá por anunsiá ku durante di e promé 8 lunanan di aña 289,979 turista di estadia a bishitá Kòrsou. Aña pasá CTB a registrá durante di e mesun periodo 277,028 turista di estadia. Esaki ta un kresementu di 5% kompará ku e sifranan di 2012; den sifranan apsoluto e kresementu registrá ta ekivalente na 12,951 turista mas tantu ku e aña anterior. E kantidat di anochinan ku turistanan a hospedá na Kòrsou ta registrá 0%- ku ta nifiká ku tur kos ta igual. Tur huntu por hasi menshon ku turistanan a hospedá 2,450,118 anochi na Kòrsou, esaki durante di e promé 8 lunanan di 2013. For di region Nort Amérika e sifranan a disminuí ku 1%.  Bishitantenan di Sur Amérika, sí a oumentá nan anochinan na Kòrsou, esaki ta konosé un kresementu di 4%. Pa Caribe tambe a registrá un kaida di 1% durante di e mesun periodo. Kontinente Europeo ta registrá 5% ménos anochi ku aña pasá e mesun temporada.

Yüli 2013:

E sifranan preliminar kompilá dor di Curaçao Tourist Board (CTB) ta mustra ku 35,193 turista di estadia a yega Kòrsou den Yüli 2013, esaki ta 2% ménos ku e mesun temporada aña pasá. Na 2012 esaki tabata 35,815 durante e mesun luna. Turismo di estadia for di Nort Amérika a krese ku 15% den luna di Yüli 2013, ku un total di 6,098 bishitante kompará ku 5,305 den Yüli 2013. Sifranan di bishitante for di Merka (US) a registrá 15% kresementu ku ta ekivalente na 5,844, Canada na su turno a registrá un kresementu di 9% pa e luna di Yüli 2013 ekivalente na 254 bishitante. Merkado di Sur Amérika a baha ku 13% den luna di Yüli 2013, ku un total di 9,159 turista di estadia kompará ku 10,555 den 2012. For di Venezuela un total di 5,704 bishitante a keda registrá, esaki ta un kaida di 17%. Sürnam a registrá un oumento den turismo di estadia, esaki ta 2%. Brazil i Colombia a konosé un kaida den sifra di estadia respektivamente 15% i 2% ménos ku aña pasá. Merkado di Oropa a registrá 8% di kaida den Yüli 2013; e merkado aki a trese un total di 14,245 turista pa Kòrsou. E pais ku usualmente ta pèrkurá pa un mayor kantidat di turista, Ulanda– den luna di Yüli ta konosé un kaida di 13%. Pa luna di Yüli nos ta risibí 11,188 turista for di Ulanda, kompará ku 12,818 den 2012. Alemania a krese registrando 5% den Yüli 2013, total 1,000 turista aleman a bishita Kòrsou. ‘Stay Over’ di den Caribe a subi ku 3% den luna di Yüli. E bishitantenan for di Aruba a baha ku 1%, ekivalente na 2,064.

Ougùstùs 2013:

E sifranan preliminar pa luna di Ougùstùs 2013 ta mustra ku 38,914 turista di estadia a yega Kòrsou; esaki ta igual ku na 2012, pues un 0%. Na 2012 esaki tabata 39,076 durante e mesun luna. Turismo di estadia for di Nort Amérika a subi ku 2% den luna di Ougùstùs 2013  ku ta ekivalente na 6,418 for di e region aki. Sifranan di bishitante for di Merka (US) a registrá 3% kresementu ku ta ekivalente na 6,126. Canada na su turno a registrá un kaida di 17% pa luna di Ougùstùs. Merkado di Sur Amérika a kai ku 2% den luna di Ougùstùs 2013, ku un total di 12,639 turismo di estadia kompará ku 12,865 den 2012. For di Venezuela un total di 7,892 bishitante a keda registrá, esaki ta marka un kaida di 4%. Sürnam i Brazil a registrá un oumento den turismo di estadia, esakinan ta 11% i 47% respektivamente. Colombia a konosé un kaida den sifra di estadia registrando 5% ménos ku aña pasá. Merkado di Oropa a registrá un kaida di 2% den Ougùstùs 2013; tresiendo 14,450 turista pa Kòrsou. Ulanda– e luna di Ougùstùs ta konosé un kaida di 5%. Pa luna di Ougùstùs nos a risibí 11,095 turista for di Ulanda, kompará ku 11,726 den 2012. Alemania a keda igual, registrando 0%, ekivalente na 1,172 bishitante. ‘Stay Over’ di den Caribe a kai ku 8% den luna di Ougùstùs. E sifra di bishitantenan for di Aruba a kai ku 14%, ekivalente na 2,059.